بريتانيا او جرمني کې د کوېډ١٩ د خپرېدو مخنیوي لپاره نوي محدودیتونه لګوي
د بریتانیا صدراعظم بوریس جانسن پرون د جنورۍ په څلورمه نېټه د ټول هېواد په کچه دریمه درجه کلابندي اعلان کړه ویې ویل چې نوي محدودیتونه به د راروانې میاشتې تر نیمايي دوام وکړي.
په دې ترڅ کې به ښوونځي، پوهنتونونه او د سلماني ګانو په څېر د غیرضروري خدماتو دکانونه بند وي او رستورانتونه به یوازې د وړلو لپاره خواړه ورکوي.
په بریتانیا کې له تېرو شپږو ورځو راهیسې هره ورځ د کرونا ويروس له پنځوس زرو زیات مثبت موارد ثبت شوي او د دې ناروغۍ له کبله د مړو کسانو شمېر ۷۵ زرو ته لوړ شوی دی.
جرمني هم ورته اقدامات په پام کې لري.
صدراعظمه انګېلامېرکل او ایالتي مشران به نن په دې اړه له غونډې وروسته پرېکړه وکړي.
په جرمني کې د کوېډ١٩ ناروغۍ له وجې د مړینو شمېر په ورځ کې له زرو اوښتی او ټول شمېر یې ۳۴ زرو ته رسېدلی.