ვაშინგტონში ეროვნული გვარდიის მობილიზება მოახდინეს დონალდ ტრამპის მომხრეთა აქციის წინ
ტრამპის მომხრეები 5 და 6 იანვარს გეგმავენ აშშ-ის დედაქალაქში საპროტესტო გამოსვლების გამართვას, რათა მხარი დაუჭირონ ტრამპის დაუსაბუთებელ მტკიცებულებებს, თითქოს საპრეზიდენტო არჩევნები ფართო მასშტაბით გაყალბდა.
300-ზე მეტი ეროვნული გვარდიელი იქნება მზად ხალხის მასების გასაკონტროლებლად, ნათქვამია კოლუმბიის ოლქის ეროვნული გვარდიის განცხადებაში.
პოლიციის უფროსის მოვალეობის შემსრულებელმა რობერტ კონტიმ განაცხადა, რომ სიფრთხილის ზომები მიღებულ იქნა, ვინაიდან „არიან პირები, რომლებსაც ჩვენს ქალაქში ცეცხლსასროლი იარაღის შემოტანა სურთ“.
საპროტესტო გამოსვლები ემთხვევა 6 იანვარს კონგრესში კენჭისყრას, რომელიც, როგორც მოსალოდნელია, დაამტკიცებს 3 ნოემბრის არჩევნების შედეგს.
ტრამპი განაგრძობს არჩევნების შედეგის გაპროტესტებას, მიუხედავად იმისა, რომ საარჩევნო სტრუქტურების წარმომადგენლებმა ორივე პარტიიდან, გუბერნატორებმა და აშშ-ის იუსტიციის სამინისტრომ დაასკვნეს, რომ არჩევნებზე ფართო მასშტაბის გაყალბება არ მომხდარა.
კონგრესს კონსტიტუციით ევალება საარჩევნო კოლეგიის მიერ გამოცხადებული შედეგების დამტკიცება, რაც ჩვეულებრივ ფორმალობაა ხოლმე. მაგრამ მინიმუმ 12-მა რესპუბლიკელმა სენატორმა და წარმომადგენელთა პალატის 140-მდე რესპუბლიკელმა წევრმა გაიმეორა ტრამპის მტკიცებულებები არჩევნების გაყალბების თაობაზე და განაცხადა, რომ დამტკიცების წინააღმდეგ მისცემს ხმას.