Чаллыда бәйрәмнәрдән соң Яңа ел чыршыларын тапшыру пункты ачыла

(Чаллы, 5 гыйнвар, «Татар-информ»). Идел буе экологик компаниясе бәйрәмнәрдән соң Чаллыда Яңа ел чыршыларын җыя башлаячак. Бу хакта бизнес-структура вәкиле хәбәр итте.

Чыршыларны 11-24 гыйнвар көннәрендә тапшырырга мөмкин. Шушы вакыт эчендә теләгән һәркем агачларны кабул итү пунктына китерә ала. Адресы: Автосборочный проезд 29/63, предприятиенең административ-көнкүреш корпусы янында.

Чыршыларны эшкәртеп, алардан витаминлы өстәмәләр һәм терлекләр өчен аслыклар ясарга ниятлиләр.