«Фатих Әмирхан атналыгы»ның беренче лекциясе язучының ядкярләренә багышланды
(Казан, 22 гыйнвар, «Татар-информ», Зилә Мөбәрәкшина). Габдулла Тукай әдәби музее татар язучысы Фатих Әмирханның тууына 135 ел тулу уңаеннан «Фатих Әмирхан атналыгы»н башлап җибәрде.
Атналык «Фатих Әмирхан ядкярляре» лекциясе белән башланды. Лекцияне 170нче мәктәп укучыларына Габдулла Тукай әдәби музееның өлкән фәнни хезмәткәре Ләйсән Медведева алып барды.
Лекциядә Фатих Әмирханның Габдулла Тукай әдәби музеенда урын алмаган Татарстан Милли музеенда саклана торган шәхси ядкярләре турында сөйләнелде. Фатих Әмирханның музейда тупланган мирасы шәхси әйберләре, гаиләсе белән бәйле тормыш-көнкүреш предметлары, үзе исән чагында чыккан китаплары, фотосурәтләр һәм кулъязмалардан тора.
Фатих Әмирхан фондына беренче материаллар 1950 елларда туплана башлый. Аның берничә күлмәге, эшләпәсе, кепкасы, яка, манжет һ.б. ир-ат киемнәре бар. «Фатих Әмирхан вафат булганнан соң, аның йөзеннән төшереп алынган маска да бар. Хәзерге вакытта ул Милли музейда саклана, аңа реставрация кирәк», — диде Ләйсән Медведева.
Лекциядә Фатих Әмирханның спектакльдә уйнаган 1903 елгы фотосурәте дә тәкъдим ителде. «Фатих Әмирхан Казанда татар театрын оештыручыларның берсе була. Ул Казанда укый торган студентларны һәм курсисткаларны берләштереп, алар белән башлап йорт спектакльләрендә уйный. Якын дусты Ризван Ибраһимов хатында „Кызганыч бала“ һәм „Гыйшык бәласе“ спектакльләрен уйнавы турында беләбез», — диде ул.
Аудиториягә 1907 елда «Әл Ислах» газетасы әгъзалары төшкән фото да тәкъдим ителде. «Бу фотоның үзгәртелгән варианты да бар, чөнки фотода Фатих Әмирханның энесе — Согуд Гарәбстанында консуллыкта дипломат булып эшләүче Ибраһим Әмирхан сурәтләнгән. 1938 елда шәхес культы корбаны дип гаепләнә һәм, шунлыктан, рәсеме капланыла, ә исеме бөтенләй телгә алынмый», — дип аңлатты ул.