Ինձ համար մեծ պատիվ էր ճանաչվել Ա-լիգայի լավագույն հայ բասկետբոլիստ. Թադե Քեշիշյան
«Վահագնի Սիթիի» ամերիկահայ բասկետբոլիստ Թադե Քեշիշյանը, որը ճանաչվել է VBET Ա-Լիգայի լավագույն հայ բասկետբոլիստ, ArmSport-ի հետ զրույցում պատմել է կարիերայի առաջին չեմպիոնության, «Դվինի» հետ եզրափակիչ դիմակայության ու Հայաստանում այս մարզաձի զարգացման մասին:
-Թադե, ի՞նչ զգացողություններ ունեք Հայաստանի չեմպիոնությունը նվաճելու առթիվ: Ինչպիսի՞ն էր «Դվինի» հետ եզրափակչի խաղը;
-Շատ ուրախ եմ պրոֆեսիոնալ կարիերայիս առաջին չեմպիոնությունը նվաճելու առթիվ: Խաղերը շատ բարդ էին: Սպասում էինք, որ «Դվինը» կպայքարի մինչև վերջ, ինչպես որ արեց: Բայց մենք լավ ու փորձառու խաղացողներ ունենք ու կարողացանք հաջողության հասնել:
-Եզրափակիչը 5 խաղից էր բաղկացած: Հոգնածությունը զգացվո՞ւմ էր:
-Եզրափակիչ սերիայի բոլոր խաղերն էլ իսկապես շատ բարդ էին, քանի որ երկու թիմն էլ շատ էր ցանկանում չեմպիոն դառնալ: Հոգնածություն իսկապես կար: Մարդիկ չգիտեն, բայց ես խաղերին մասնակցում էի սաստիկ հարբուխով: Բայց երբ հաղթելու ժամանակն է, պետք է ամեն ինչ մի կողմ դնես:
-Ինչի՞ շնորհիվ կարողացաք հաջողության հասնել այս դիմակայությունում:
-Կարծում եմ՝ վճռորոշ դեր խաղաց այն կապվածությունը, որ կա մեր թիմակիցների միջև: Մենք միշտ իրար օգնում ենք: «Վահագնի Սիթին» շատ յուրահատուկ ու առանձնահատուկ թիմ է: Առհասարակ, «Վահագնի Սիթիում» անցկացրած այս կարճ ժամանակում կուտակած հիշողություններն ամբողջ կյանքում չեմ մոռանա, սա անմոռանալի մրցաշրջան էր, ինչի համար շնորհակալություն եմ հայտնում «Վահագնի Սիթիին» և Շանթին:
Կցանկանամ նաև շնորհակալություն հայտնել իմ ընտանիքին իրենց մշտական սիրո և աջակցության համար:
-Ձեր ապագան «Վահագնի Սիթիի» հե՞տ եք կապում:
-Իմ, նպատակը միշտ եղել է ամենաբարձր մակարդակում բասկետբոլ խաղալը: Եթե «Վահագնի Սիթին» ցանկանա, ես սիրով կներկայացնեմ այս ակումբը նաև հաջորդ մրցաշրջանում:
-Ճանաչվեցիք Ա-լիգայի լավագույն հայ բասկետբոլիստ: Սա ի՞նչ նշանակություն ունի Ձեզ համար:
-Իմ նպատակը միշտ եղել է առաջնությունում հաղթելն ու չեմպիոն դառնալը, բայց ինձ համար մեծ պատիվ էր այս կոչմանն արժանանալը: Հույս ունեմ՝ երեխաներին կոգեշնչեմ զբաղվել բասկետբոլով, ու մենք կկարողանանք զարգացնել այս խաղը Հայաստանում:
-Առհասարակ մեր երկրում բասկետբոլի հանդեպ հետաքրքրությունը մեծացե՞լ Է ու ի՞նչ է պետք այն ավելի զարգացնելու համար:
-Կարծում եմ՝ այո, ու ոչ միայն երեխաների կողմից: Վերջին 6 տարում ես անընդհատ գալիս եմ Հայաստան ու նկատել եմ, որ հիմա ավելի մեծ թվով երեխաներ են զբաղվում բասկետբոլով, քան՝ երբևէ: Կարծում եմ՝ երեխաներին պետք է անհրաժեշտ պայմաններով ապահովենք՝ մարզասրահներ, գնդակներ, մարզահագուստ և այլն, եթե ցանկանում ենք, որպեսզի մարզաձևը մեր երկրում զարգանա: Սա պետք է, որպեսզի երեխաները կարողանան զարգացնել խաղի հանդեպ իրենց կիրքն այնպես, ինչպես ես՝ երբ երեխա էի: Բասկետբոլը շատ հետաքրքիր մարզաձև է ու շատ կարևոր՝ կյանքի համար: