AstraZeneca-ს ვაქცინის ზოგიერთ ევროპულ ქვეყნაში გამოყენების შეჩერების შემდეგ, WHO მოუწოდებს ამ ვაქცინით აცრის გაგრძელებისკენ
თრომბის გაჩენის შემთხვევის გამო, ნიდერლანდთან ერთად, კოვიდ-19-ის საწინააღმდეგო AstraZeneca-ს ვაქცინით მოქალაქეების აცრა შეაჩერა გერმანიამ, საფრანგეთმა, იტალიამ, ასევე ირლანდიამ, დანიამ, ნორვეგიამ, ბულგარეთმა, და ევროპის გარეთ, ტაილანდმა. ამ მწარმოებლის ვაქცინის გარკვეული სერიით აცრა შეაჩერეს ბალტიის ქვეყნებმა და ავსტრიამ, ასევე ლუქსემბურგმა და რუმინეთმა.
ნიდერლანდის მთავრობის საიტზე გამოქვეყნებულ განცხადებაში წერია, რომ „ახლად აღმოჩენილი ინფორმაციის საფუძველზე, ნიდერლანდის სამედიცინო საშუალებების სამმართველო გვირჩევს, უსაფრთხოების ზომების დაცვის მიზნით, შევაჩეროთ AstraZeneca-ს ვაქცინის გამოყენება. მიღებულია გადაწყვეტილება, რომ არ გამოვიყენოთ AstraZeneca მომდევნო ორის კვირის განმავლობაში, 28 მარტის კვირამდე“.
ნიდერლანდმა განაცხადა ამასთან, რომ გადაწყვეტილება მიღებულია დანიიდან და ნორვეგიიდან მიღებული ინფორმაციის საფუძველზე, რომ ამ ვაქცინას ახლავს სერიოზული თანმდევი ეფექტები, თრომბის სახით.
15 მარტს ჯანდაცვის მსოფლიო ორგანიზაციამ გამოაცხადა, რომ „ქვეყნებმა უნდა გააგრძელონ AstraZeneca-ს კოვიდ-19-ის ვაქცინის გამოყენება“. WHO-ს თანახმად, მას არ სურს, რომ გაჩნდეს პანიკა და ამიტომ ურჩევენ ქვეყნებს ამ ვაქცინის გამოყენება გააგრძელონ. მსოფლიო ჯანდაცვის ორგანიზაცია ასევე აცხადებს, რომ არ დასტურდება სერიოზული გვერდითი ეფექტები.
ორგანიზაციის მთავარმა მკვლევარმა, სუმაია სუამინათამ განაცხადა, რომ ამ დრომდე გართულების შემთხვევების და ვაქცინის კავშირი არ დაგვიდგენიაო.
WHO-ის ექსპერტები 16 მარტს AstraZeneca-ს ვაქცინის გარშემო იმსჯელებენ, იტყობინება გერმანიის tagesschau.de. WHO-ის ხელმძღვანელის, ტედროს ადჰამონ ღებრეიესუსის თქმით, მრჩეველთა საბჭო, რომელიც განიხილავს ვაქცინის უსაფრთხოების მონაცემებს, მჭიდრო კონტაქში იმყოფება ევროპის სამედიცინო სამსახურთან (EMA), რომელიც იკვლევს პრეპარატებს და რეკომენდაციას იძლევა ვაქცინების გამოყენების შესახებ.
ევროპის სამედიცინო უწყება იტყობინება, რომ თავის მხრივ ახლოს თანამშრომლობს საკუთრივ ფარმაცევტიულ კომპანიასთან, სისხლის დაავადებათა ექსპერტებთან და სხვა უწყებებთან, მათ შორის, ბრიტანეთის სამედიცინო და ჯანდაცვის პროდუქტების მარეგულირებელ სააგენტოსთან (MHRA), რომელსაც დიდი გამოცდილება აქვს ვაქცინის მოხმარებაში. MHRA-ს მიერ იქნა ბრიტანეთში გაცემული ვაქცინის 11 მილიონი დოზა.
მანამდე, ნორვეგიაში, ჯანდაცვის სფეროს მუშაკებს, დაუდგინეს სისხლდენა, თრომბი და თრომბოციტების დაბალი რაოდენობა, იტყობინებოდა ნორვეგიის ჯანდაცვის სამსახური.
თვითონ AstraZeneca, ვაქცინის ბრიტანულ-შვედური მწარმოებელი ამტკიცებს, რომ მისი პრეპარატი უსაფრთხოა. ათ მილიონ შემთხვევაზე მეტის ანალიზის შედეგად დადგინდა, რომ "არ არსებობს ფილტვების ემბოლიის ან თრომბოზის გაზრდილი საფრთხის" არავითარი დასტური, აცხადებს AstraZeneca.