Францино депортаци йинчу Гадаев ненан цIийнах хьаьвсина Нохчийчуьра ницкъхой
Францера депортаци йинчу мухIажаран Гадаев Мохьмадан ТIехьа-Мартанан кIоштарчу Закан-Юьртахь ехачу ненан цIийнах хьаьвсина кадыровхой. ДIахьедина, тхов тIехь шайна маса-топ карийна аьлла.
Закан-Юьртарчу ненан хIусамехь Гадаев хиланза 11 шо ду, хаам бина Кавказ.Реалиига цуьнгахь хиллачу зудчо ПетIамата.
"Герз Мохьмадах хьарчо бохку уьш [ницкъхой], бехк кхолла бохку. Францехь мухIажар ваьлла вехачу цо муха дIалур дара герз, цIа а вахана, тIаккха муха юхагIур вара? Боккха бала бу бохьуш берг", – аьлла зудчо.
Хьалхо "Мемориал" центран (Оьрсийчоьнан Iедало арахьарчу агентийн статусе яьккхина "Мемориал", амма "Мемориало" тIе ца иза - ред.). куьйгалхочо Орлов Олега хаам баржийра, Гадаевна дуьхьал Охан-беттан 10-чохь бехктакхам айбина низамца доцчу кепехь герзаш лелорна, аьлла.
Францехь лецира Гадаев Мохьмад Охан-беттан 8-чохь, иза полице вахча. ХIора денна лелаш вара иза цига, ша депортацех хьалхавоккхуш кхело бина сацам кхочушбеш: адвокато тоьшаллаш далийнера цунна Оьрсийчохь ваха кхераме хилар тIеччIагIдеш.
Амма кхелан сацам а ца ларбеш, Францино экстрадици йина цунна. Хьалхо ша депортацин лагерехь сацийча, протест кхайкхош, шен гай цистира Гадаевс.
Москва дIакхачийча, "Шереметьево" аэропортехь ФСБ-н белхахоша сацийна латтийра иза, адвокаташа а, юкъаралхоша а сахьташ дехира иза дIахецаре хьоьжуш.