Бошланғич синф ўқувчисининг рюкзакидан кокаин топилди
АҚШнинг Шимолий Каролина штатида бошланғич синфда ўқийдиган қизалоқ мактабга 260 грамм кокаин олиб келгани аниқланди. Бу ҳақда «New York Post» газетаси хабар тарқатган.
Ушбу кўнгилсиз воқеа 30 март куни Нью-Берн шаҳрида юз берган. Ўқувчи қизнинг рюкзакидан 260 грамм миқдорида гиёҳванд модда чиққанидан сўнг суриштирув ишлари олиб борилган. Натижада кокаиннинг ҳақиқий эгаси 27 ёшли Шэрай Бектон эканлиги аниқланиб, аёл ҳибсга олинган. Шэрай Бектон рюкзакидан гиёҳванд модда топилган қизалоқнинг онасими ёки йўқми, хабарда бунга аниқлик киритилмаган. Мазкур ҳолат бўйича тергов ишлари олиб борилмоқда.
Аввалроқ Англиянинг Лестер шаҳрида уч нафар мактаб ўқувчиси синфдоши уларни гиёҳванд модда қўшиб пиширилган печенье билан меҳмон қилганидан сўнг касалхонага тушиб қолишгани ҳақида хабарлар пайдо бўлган эди. Айни пайтда ҳар учала ўқувчининг ҳам соғлиғи жойида. Мактаб вакиллари ҳамда полиция юз берган ҳодиса бўйича текширув ўтказиб, суриштирув ишларини олиб бораётгани айтилмоқда.