Վաշինգտոնում հայտարարել են, որ գրեթե ավարտել են Փհենյանի նկատմամբ քաղաքականության վերանայումը
Վաշինգտոնը մոտ է Փհենյանի նկատմամբ ամերիկյան քաղաքականության վերանայման ավարտին․ այդ թեմայի շուրջ քննարկում կունենան նաև ԱՄՆ նախագահ Ջո Բայդենը և Ճապոնիայի վարչապետ Յոսիհիդե Սուգան: Այս մասին ճեպազրույցի ժամանակ հայտարարել է ԱՄՆ վարչակազմի բարձրաստիճան ներկայացուցիչը, փոխանցում է ՏԱՍՍ-ը:
«Միացյալ Նահանգները մոտենում է Հյուսիսային Կորեայի նկատմամբ իր քաղաքականության վերանայման ավարտին։ Ճապոնիայի հետ խորհրդակցությունները շարունակվում են իրենց հունով, բայց այժմ երկու երկրի ղեկավարները հնարավորություն կունենան անդրադառնալ նաև ԱՄՆ-ի համար այս կարևոր հարցին»,- նշել է նա՝ հստակեցնելով, որ կողմերը, մասնավորապես, կքննարկեն ԿԺԴՀ-ի հրթիռամիջուկային ծրագիրը:
Նշվում է, որ հատուկ ճեպազրույցը նվիրված է եղել Ճապոնիայի վարչապետի՝ ԱՄՆ նախատեսված պաշտոնական այցին։ Հայտնի է, որ նա ուրբաթ կհանդիպի Բայդենի հետ։
Սպիտակ տունը հունվարին հայտնել էր, որ գործող վարչակազմը պատրաստվում է ԿԺԴՀ-ի նկատմամբ նոր ռազմավարություն մշակել։