პროკურატურა გიორგი მუმლაძისთვის 5000-ლარიანი გირაოს შეფარდებას ითხოვს
მუმლაძის აღკვეთის ღონისძიებაზე თბილისის საქალაქო სასამართლო ამ წუთებში მსჯელობს. მოსამართლე გადაწყვეტს, სრულად დააკმაყოფილებს პროკურატურის მოთხოვნას, ნაწილობრივ, თუ საერთოდ არ გაითვალისწინებს.
გიორგი მუმლაძე სხვა 4 აქტივისტთან ერთად პარტია "ქართული ოცნების" ოფისთან 14 აპრილს დააკავეს, როცა ის გალში მცხოვრები საქართველოს მოქალაქეებისთვის 5-დღიანი სავალდებულო კარანტინის გაუქმებას ითხოვდა. დავით კაპანაძე და სხვა აქტივისტები კი - ამავე დღის მეორე ნახევარში შინაგან საქმეთა სამინისტროში, სადაც აპროტესტებდნენ იმას, რომ მუმლაძეს ბრალი სისხლის სამართლის კოდექსით გათვალისწინებულ დანაშაულში დასდეს, რაც 3-დან 5 წლამდე პატიმრობას ითვალისწინებს. აქტივისტებს პოლიცია, როგორც წესი, ადმინისტრაციული კოდექსის დარღვევის გამო აკავებს ან აჯარიმებს.
მუმლაძის წინააღმდეგ გამოძიება სისხლის სამართლის კოდექსის 353-ე მუხლის პირველი ნაწილით მიმდინარეობს, რაც პოლიციის თანამშრომლებისთვის წინააღმდეგობის გაწევას გულისხმობს.