(Казан, 16 апрель, «Татар-информ»). Бүген, 16 апрельдә, Уфада Башкортстан ир-атларының беренче форумы уза. Анда катнашу өчен «Торатау» конгресс-холлына республиканың иң актив вәкилләре — сәясәтчеләр, эшмәкәрләр, җәмәгать эшлеклеләре, күп балалы әти кешеләр җыелды, дип « Башинформ » хәбәр итә. «Башкортстан ир-атлары форумы — бу шундый беренче чара, — диде ачылу тантанасында „Башкортстан ир-атлары берлеге“ рәисе, РФ Дәүләт Думасы депутаты Зариф Байгускаров. — Безнең бурыч — авыллардан, районнардан актив һәм инициативалы ир-атларны берләштерү, көчләрне туплап бергә эшләү». Ул шулай ук оешма нәтиҗәле эшләсен өчен эшне системалаштырырга, конкрет максатлар билгеләргә һәм аларга бергәләп ирешергә кирәклеген әйтте. Аек яшәү рәвешенә, җәмгыятьтә ата кешенең ролен күтәрүгә, районнарда ир-атлар берлекләре белән эшләүне оештыруга кагылышлы кайбер юнәлешләр билгеләнгән, диелә хәбәрдә.
