ზურა ჯაფარიძე კრისტიან დანიელსონის დოკუმენტს ხელს არ მოაწერს

“გირჩი – მეტი თავისუფლების” ლიდერი, ზურა ჯაფარიძე კრისტიან დანიელსონის დოკუმენტს ხელს არ მოაწერს. ამის შესახებ “რადიო თავისუფლებას” ინფორმაცია პარტიის პრესსამსახურიდან მიაწოდეს. ეს საკითხი აქტუალური მას შემდეგ გახდა, რაც ხელმოწერაზე მზაობა გამოთქვა “ქართულმა ოცნებამ”.

დოკუმენტს ხელს არ აწერს “ევროპული საქართველოც”.

დღეს “ქართული ოცნება” საჯაროდ აწერს ხელს ევროკავშირის ევროპული საბჭოს პრეზიდენტის შარლ მიშელის ეგიდით შექმნილ დოკუმენტს, რომელიც პრეზიდენტის სპეციალურმა წარმომადგენელმა კრისტიან დანიელსონმა წარადგინა. ამის შესახებ მედიას საგანგებო ბრიფინგზე საქართველოს პარლამენტის თავმჯდომარემ, არჩილ თალაკვაძემ განუცხადა. მისი თქმით, დოკუმენტის ხელმოწერაზე მზადყოფნა „ქართულმა ოცნებამ“ დიალოგის დასკვნით ეტაპზევე გამოხატა, თუმცა აქამდე ხელი არ მოაწერა, რადგან ოპოზიციისგან შემხვედრ ნაბიჯებს და ელჩების დამატებით კონსულტაციებს ელოდებოდნენ:

გადაწყვეტილება ევროკავშირის ეგიდით შემუშავებული შეთანხმების შესახებ მივიღეთ საზოგადოებასთან და საერთაშორისო პარტნიორებთან ნდობის განმტკიცებისთვის, რომ არ დარჩეს კითხვები, ხომ არ იყო პოლიტიკური შეთანხმების შესაძლებლობა გაშვებული ხელიდან „ქართული ოცნების“ მიზეზით“, – განაცხადა არჩილ თალაკვაძემ.

დანიელსონის მიერ მმართველი პარტიისა და ოპოზიციისთვის 31 მარტს ხელმოსაწერად შეთავაზებული დოკუმენტი შეიცავდა 5 საკითხს:

• პოლიტიზებულ მართლმსაჯულებად აღქმულ საკითხებზე რეაგირება;
• ამბიციური საარჩევნო რეფორმა;
• კანონის უზენაესობა/სასამართლო რეფორმა;
• პარლამენტში ძალაუფლების განაწილება;
• მომავალი არჩევნები.