Qırımda faal Ervin İbragimovnı hırsızlav davasınıñ tahqiqatı 2017 yılında toqtatıldı
Mahkemege Qırım ve Aqyardaki Rusiye Tahqiqat komitetiniñ idaresinden cevap keldi: «Ervin İbragimovnıñ ğayıp olmasınen bağlı cinaiy dava 2017 senesi sentâbrniñ 25-nde mesüliyetke çekilecek insanlarnıñ şahsiyetlerini bilmek imkânsız olğanından toqtatıldı».
«Mahkeme, Qırım Cumhuriyetindeki tahqiqat komitetiniñ baş tahqiqat idaresine Ervin İbragimovnıñ bulunğan yerini, mahkemege kelip, şaatlıq ete bilemi bilmek içün muracaat yolladı. Ve bıltır dekabrniñ 24-nde Tahqiqat komitetiniñ Baş tahqiqat idaresi Ermeni Bazar şeer mahkemesine cevap bergeni belli oldı, anda Ervin İbragimovnıñ hırsızlanmasınen bağlı davaları bar, bulunğan yeri belli degil, dava ise 2017 senesi toqtatıldı, dep aytıla», – dep añlattı Cemilevniñ advokatı Nikolay Polozov Qırım.Aqiqatqa.
2020 senesi dekabr ayında Mustafa Cemilevniñ davası mahkemede baqılğanda şaat Ervin İbragimov kelmegeni içün teneffüs ilân etilgen edi.
2016 senesi mayıs ayında Bağçasarayda Dünya qırımtatar kongressiniñ icra komitetiniñ azası Ervin İbragimov hırsızlandı. O vaqıttan berli Qırımdaki Rusiye quvetçileri onı tapmadı. «KrımSOS» cemaat teşebbüsiniñ faalleri Kyivdeki Rusiye elçihanesi ögünde onı tapmaq talabınen muntazam sürette toplaşa.