Ermeni Bazar mahkemesi Mustafa Cemilevge qarşı davanı qapatmağa razı olmadı – advokat
Bu aqta Cemilevniñ advokatı Nikolay Polozov Qırım.Aqiqat mühbirine bildirdi.
«Bugünki mahkeme oturışuvı vaqtında mahkeme rus tiline tercime etilgen silâ ve patronlarnıñ ekspertizasını tedqiq etken soñ, imaye, tahqiqatçı bu ekspertiza neticelerine esaslanıp, qararda sahte malümat bergeni içün Mustafa Cemilevniñ cinayet yapmağanını aytıp, cinaiy dava toqtatılmasını rica etti», – dedi Polozov.
Aprelniñ 15-nde Ermeni Bazar mahkemesiniñ oturışuvında qabaatlav tarafı Cemilevniñ 2014 senesi mayısta Qırım ve Herson vilâyetiniñ memuriy sıñırını qanunsız keçüv davasınen bağlı video delillerini kösterip bitirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Hatırlatamız, qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.