د شهزاده فیلیپ مړی د بریتانیا په سلطنتي حضیره کې خښ شو
د شهزاده فلیپ د جنازې په مراسمو کې چې پرون د اپرېل په ۱۷مه نېټه ترسره شول، کونډې ملکې دوهمې الیزابت او څو محدودو کسانو ګډون وکړ. دا مراسم د کرونا ویروس د مخنیوي لپاره د اقداماتو په ترڅ کې په محدود او مختصر ډول ترسره شول.
د مړي له خښولو مخکې په ټوله بریتانیا کې د شهزاده فیلیپ اروا ته د درناوي په خاطر یوه دقیقه چوپتیا اعلان شوه.
شهزاده فیلیپ چې د ۷۳ کلونو لپاره د ملکې دوهمې الیزابت مېړه وو، د اپرېل په نهمه د ناروغۍ له کبله مړ شو. نوموړی له مړینې مخکې د زړه د ناروغۍ او عفونت له کبله د څه باندې یوې میاشتې لپاره په روغتون کې بستر وو او د مړینې پر مهال ۹۹ کلن و.
د شاهزاده فیلیپ د جنازې مراسم د لندن په لوېدیځ کې په سنت جورج کلیسا کې دننه په ویندزور کلا کې ترسره شول. د دې مراسمو ګډونوالو باید د کرونا د مخنیوي لپاره ټولنیز واټن په پام کې نیولی وی.
فقید شهزاده ۱۴ کاله د بریتانیا په سلطنتي سمندري ځواکونو کې خدمت وکړ او د دوهمې نړیوالې جګړې شاهد پاتې شوی و. د موسیقۍ او سندرو هغه ټوټې چې د جناز ې په مراسمو کې وغږول شوې، د شهزاده فیلیپ د پوځي خدمتونو او د څه باندې ۷۰ کلونو په ترڅ کې له ملکې څخه د ده د ملاتړ په اړه وې. د بریتانیا ملکه راتلونکې اوونۍ ۹۵ کلنه کېږي.
د شهزاده فیلیپ د جنازې په مراسمو کې د بریتانیا د وسلهوالو ځواکونو سرتېري په منظمو لیکو کې ودرېدل او د درناوي لپاره د توپونو ډزې وشوې.
د جنازې په مراسمو کې د خلکو د ګڼې ګوڼې د مخنیوي په مقصد ټول مراسم د ویندزور په پوځي کلا کې دننه ترسره شول، خو دا ټول جریان پر ټلوېزیونونو په مستقیم ډول خپرېده.
شهزاده ویلیم او ورور یې شهزاده هري هم په مراسمو کې حاضر وو. د شهزاده فیلیپ له مړینې مخکې متحده ایالاتو ته د شهزاده هري او د هغه د امریکايۍ مېرمنې میګان کډه کېدلو د بریتانیا د سلطنتي کورنۍ ستنې کمزورې کړې.
ډاکټرانو میګان ته چې د دوهم ځل لپاره حامله ده، سپارښتنه کړې چې د صحي دلایلو له کبله باید سفر ونهکړي او دا مراسم دې په کالیفورنیا کې له خپل کور څخه پر ټلوېزیون وګوري.