Սաուդյան Արաբիան և Իրանը հարաբերությունների վերականգնման շուրջ բանակցություններ են սկսել․ Financial Times
Սաուդյան Արաբիայի և Իրանի բարձրաստիճան պաշտոնյաները հինգ տարի առաջ խզված դիվանագիտական հարաբերությունները վերականգնելու նպատակով բանակցություններ են վարում, գրում է Financial Times-ը՝ վկայակոչելով իր աղբյուրները:
Պարբերականի տվյալներով՝ բանակցությունները, որոնք ապրիլի 9-ին Բաղդադում տեղի են ունեցել Իրաքի վարչապետ Մուստաֆա ալ Քազեմիի միջնորդությամբ, երկու երկրների միջև 2016 թվականից ի վեր «առաջին նշանակալի քաղաքական քննարկումներն են»:
Աղբյուրները հայտնում են, որ բանակցությունների հաջորդ փուլը նախատեսված է հաջորդ շաբաթ։ Նշվում է, որ բանակցությունները տեղի են ունեցել ԱՄՆ նախագահ Ջո Բայդենի՝ միջուկային գործարքը վերականգնելու և տարածաշրջանում լարվածությունը թուլացնելու փորձերի ֆոնին:
«Մյուս գործոնը Եմենում վեցամյա պատերազմին վերջ դնելու ցանկությունն է»,- գրում է Financial Times-ը:
Ընդ որում, ինչպես նշում է թերթը, բարձրաստիճան սաուդցի պաշտոնյան հերքել է Իրանի հետ բանակցությունների անցկացման լուրը: