დიდ ბრიტანეთს განზრახული აქვს ორი სამხედრო გემის გაგზავნა შავ ზღვაში
საუბარია, სავარაუდოდ, „დარინგის“ ტიპის სარაკეტო ნაღმოსან და „დიუკის“ კლასის ფრეგატზე, რომლებიც შავ ზღვაში ბოსფორის სრუტით შევლენ. მათ მხარდასაჭერად კი ხმელთაშუა ზღვაში დარჩება ბრიტანული ავიამზიდი „დედოფალი ელისაბედი“.
დიდი ბრიტანეთის თავდაცვის სამინისტროს წარმომადგენელს ამ ინფორმაციაზე კომენტარი არ გაუკეთებია. გამოცემასთან საუბარში მხოლოდ აღნიშნა, რომ ლონდონი და მისი მოკავშირეები უპირობოდ უჭერენ მხარს „უკრაინის სუვერენიტეტსა და ტერიტორიულ მთლიანობას“.
მანამდე გავრცელდა ცნობა, რომ აპრილის შუა რიცხვებში შავ ზღვაში ორი სამხედრო საესკადრო ნაღმოსანი გემის გაგზავნას გეგმავდა აშშ-ის სამხედრო-საზღვაო ფლოტი. მაგრამ, როგორც „სანდეი ტაიმსი“ წერს, პრეზიდენტმა ჯო ბაიდენმა აღნიშნული განკარგულება გააუქმა, რათა თავიდან აერიდებინა რუსეთთან დამატებითი დაძაბულობა.
უკრაინის მიმართ რუსეთის მიმდინარე აგრესიის შესახებ გავრცელებული ცნობების ფონზე, კერძოდ, რომ უკრაინის საზღვართან და ყირიმში მოსკოვი ზრდის თავისი შეიარაღებული ძალების რაოდენობას, აშშ-ის სახელმწიფო დეპარტამენტმა აპრილის დასაწყისში განაცხადა, რომ მხარს უჭერს უკრაინას და გამოხატავს შეშფოთებას „რუსეთის მიმდინარე აგრესიისა და აღმოსავლეთ უკრაინაში“ უსაფრთხოების მხრივ შექმნილი ვითარების გამო.
2 აპრილს აშშ-ის პრეზიდენტი, ჯო ბაიდენი, ამ თანამდებობის დაკავების შემდეგ პირველად ესაუბრა უკრაინის პრეზიდენტს, ვოლოდიმირ ზელენსკის, იმ ფონზე, როცა ვრცელდება შემაშფოთებელი ცნობები რუსეთის მიერ ჯარის რაოდენობის გაზრდაზე უკრაინის საზღვართან.