Բալթյան նավատորմը կստանա նոր սուզանավեր տարածաշրջանում ՆԱՏՕ-ի ուժեղացման ֆոնին
Նոր դիզելային սուզանավեր կմտնեն Ռուսաստանի Բալթյան նավատորմ՝ Ռուսաստանի սահմանների անմիջական հարևանությամբ ՆԱՏՕ-ի ուժեղացման ֆոնին: Այս հայտարարությունը Բալթյան նավատորմի օրվա կապակցությամբ Telegram-ում արել է Ռուսաստանի ռազմածովային ուժերի գլխավոր հրամանատար Նիկոլայ Եվմենովը, հաղորդում է Gazeta.ru-ն:
Ըստ նրա՝ արդեն մշակված է այս նավատորմի դիզելային-էլեկտրական սուզանավերով, նոր ինքնաթիռներով ու առափնյա համալիրներով զինելու հարցը:
Ռազմածովային ուժերի գլխավոր հրամանատարն ընդգծել է, որ «մերձբալթյան նավատորմի սուզանավային բաղադրիչը կհամապատասխանի իր առջև դրված խնդիրների ծավալին»:
Նա նաև մատնանշել է, որ այս նավատորմը մինչ օրս «կարևորագույն գործիք է՝ արևմտյան ուղղությամբ Ռուսաստանի անվտանգությունն ապահովելու համար»: