Թագավորական կենսագիրը պատմել է Քեյթ Միդլթոնի` գիշերօթիկ դպրոցում ունեցած «ծանր» տարիների մասին
Մեծ Բրիտանիայի արքայազն Ուիլիամի կնոջ`Քեմբրիջի դքսուհի Քեյթ Միդլթոնի դպրոցական տարիները ծայրաստիճան դաժան են անցել միջին դպրոցում բռնության ենթարկվելու պատճառով:
Այս մասին հայտնում է Daily Star-ը՝ թագավորական ընտանիքի մասին կենսագրական գրքերի հեղինակ Քեթի Նիքոլի խոսքերին հղումով:
Կենսագիրն ասել է, որ Քեյթ Միդլթոնը Դաուն Հաուսի աղջիկների գիշերօթիկ դպրոց է տեղափոխվել 13 տարեկանում, մինչդեռ երեխաների մեծ մասն այնտեղ հաճախել է 11 տարեկանից: «Ուիլյամն ու Հարին» գրքի հեղինակի խոսքով՝ արքայազն Ուիլյամի ապագա կինը հայտվել է այնպիսի միջավայրում, որը չի ընդունել նոր աշակերտուհուն:
Գրողը հավելել է՝ Քեյթն ավելի նիհար և բարձրահասակ է եղել, քան իր դասընկերուհիները: Նրան չեն ընդգրկել լակրոսի (գնդակով թիմային խաղ,- խմբ.) դպրոցական թիմում, ինչը «մեծ հարված է հասցրել աղջկա հպարտությանը», և ինչի համար հասակակիցները ծաղրել են Քեմբրիջի ապագա դքսուհուն:
«Բոլորն ուզում էին լինել լավագույնը, ամենաթլետիկը և գեղեցիկը: Կարծում եմ, որ Քեյթն ամենասկզբից էլ ուրախ չի եղել»,- հաստատել է Քեյթի հետ նույն դպրոցում սովորած Էմմա Սեյլը:
Բացի այդ, դքսուհու նախկին դասընկերուհիներից մեկն ասել է, որ առաջնորդության համար անընդհատ պայքարը մեծ ճնշում է գործադրում աղջիկների վրա:
Հիշեցնենք՝ արքայազն Ուիլյամի ու Քեյթ Միդլթոնի հարաբերությունները սկսվել են 2000-ականների սկզբին: 2011 թվականի ապրիլի 29-ին նրանք ամուսնացել են, որից հետո Միդլթոնին շնորհվել է Քեմբրիջի դքսուհու կոչում: