Անհրաժեշտ է հայ-ադրբեջանական սահմանին լարվածությունը խաղաղ ճանապարհով կարգավորել. ԱՄՆ նախագահի խորհրդականը զրուցել է Ալիևի հետ
ԱՄՆ նախագահի ազգային անվտանգության հարցերով խորհրդական Ջեյք Սալիվանը մայիսի 17-ի երեկոյան զանգահարել է Ադրբեջանի նախագահ Իլհամ Ալիևին, ինչի մասին հաղորդում է Ադրբեջանի նախագահի մամուլի ծառայությունը:
Հեռախոսազրույցի ընթացքում կողմերը գոհունակություն են հայտնել երկկողմ հարաբերությունների առնչությամբ, ընդգծվել է ինչպես երկրների, այնպես էլ տարածաշրջանի համար խաղաղության և անվտանգության ապահովման տեսանկյունից այդ հարաբերությունների կարևորությունը:
Սալիվանն անհանգստություն է հայտնել հայ-ադրբեջանական սահմանին լարվածության առնչությամբ և ընդգծել այդ տարաձայնությունները խաղաղ ճանապարհով կարգավորելու անհրաժեշտությունը: Նա նաև ընդգծել է կողմերի կողմից միջազգային սահմանի դեմարկացիայի հարցի կառուցողական քննարկման անհրաժեշտությունը:
Սալիվանը հայտնել է ԱՄՆ-ի` տարածաշրջանում խաղաղության հասնելու հարցում հանձնառությունը:
Ինչ վերաբերում է ադրբեջանական կողմին, ապա Ալիևը հայտարարել է, որ Բաքուն հանձնառու է տարածաշրջանում խաղաղության և կայունության ապահովմանը: Նա դրական է գնահատել տարածաշրջանում հետպատերազմյան իրավիճակը` ընդգծելով, որ հակամարտության ավարտից վեց ամիս անց իրավիճակը տարածաշրջանում, այդ թվում` հայ-ադրբեջանական սահմանին կայուն է:
Ալիևը համաձայնել է Սալիվանի հետ այն հարցում, որ անհրաժեշտ է Հայաստանի և Ադրբեջանի միջև միջազգային սահմանի դելիմիտացիայի բանակցություններ սկսել և ընդգծել այդ գործընթացի` 2020թ. նոյեմբերի 10-ի եռակողմ հայտարարությանը համապատասխանելու կարևորությունը:
Հիշեցնենք, որ Նիկոլ Փաշինյանը հեռախոսազրույց է ունեցել ԱՄՆ նախագահի ազգային անվտանգության հարցերով խորհրդական Ջեյք Սալիվանի հետ՝ վերջինիս նախաձեռնությամբ, ինչի մասին տեղեկացնում է Կառառվարության մամուլի ծառայությունը:
Նիկոլ Փաշինյանը շնորհակալություն է հայտնել ԱՄՆ նախագահի կողմից Հայոց ցեղասպանության տարելիցին արված հայտարարության կապակցությամբ՝ նշելով դրա առանցքային նշանակությունը:
Զրուցակիցներն անդրադարձել են հայ-ադրբեջանական սահմանին ստեղծված իրավիճակին։
Ամերիկյան կողմն անընդունելի և սադրիչ է համարել Հայաստանի սահմանից ներս ադրբեջանական ուժերի իրականացրած գործողությունները և տեղեկացրել, որ ԱՄՆ դիրքորոշումը ներկայացվելու է նաև ադրբեջանական ղեկավարությանը՝ պահանջով դուրս բերել իրենց ուժերը ՀՀ տարածքից:
Խորհրդական Սալիվանը բարձր է գնահատել տվյալ իրավիճակում հայկական կողմի ցուցաբերած զսպվածությունը և հարցերը ոչ թե ռազմական, այլ դիվանագիտական ճանապարհով լուծելու քայլերը:
Ամերիկյան կողմն իր մտահոգությունն է հայտնել նաև Ադրբեջանում պահվող հայ գերիների առնչությամբ և ընդգծել նրանց վերադարձի ապահովման կարևորությունը։
ԱՄՆ նախագահի ազգային անվտանգության հարցերով խորհրդականը բարձր է գնահատել ժողովրդավարության ամրապնդման հարցում Հայաստանի կառավարության հանձնառությունը և հավաստիացրել, որ ԱՄՆ-ն շարունակելու է աջակցել Հայաստանին ժողովրդավարական օրակարգի առաջմղման հարցերում: