Ուկրաինան ցանկանում է ԱՄՆ-ից կորոնավիրուսի դեմ պատվաստանյութ ստանալ
Ուկրաինայի արտաքին գործերի նախարար Դմիտրի Կուլեբան այսօր կայացած ճեպազրույցի ընթացքում նշել է, որ Միացյալ Նահանգներում երկրի դեսպան Օքսանա Մարկարովային հանձնարարել է կապվել Սպիտակ տան հետ՝ կորոնավիրուսի դեմ պատվաստանյութեր ստանալու հարցը քննարկելու նպատակով։ Այս մասին հայտնում է korrespondent.net լրատվականը։
ԱԳ նախարարը հիշեցրել է, որ Միացյալ Նահանգների նախագահ Ջո Բայդենը հայտարարել էր մինչև հունիսի վերջ պատվաստանյութի 80 միլիոն չափաբաժին այլ երկրների տրամադրելու որոշման մասին։
«Երեկ Վաշինգտոնում մեր դեսպանին հանձնարարել եմ դիմել Սպիտակ տուն՝ այս ուղղությամբ մեր համագործակցության բովանդակային քննարկման համար։ Համոզված եմ, որ այս ուղղությամբ հաջողության կհասնենք», - ասել է Կուլեբան։
Միացյալ Նահանգների նախագահը խոստացել է բացի AstraZeneca-ի պատվաստանյութի 60 միլիոն խմբաքանակից տրամադրել նաև 20 միլիոն չափաբաժին Moderna, Pfizer և Johnson&Johnson ընկերությունների պատվաստանյութ, սակայն, թե որ երկրները կարող են այն ստանալ՝ չի հստակեցվել։
Լրատվականը հիշեցրել է, որ ապրիլի 21-ին հայտնի էր դարձել, որ ԱՄՆ-ի իշխանությունները քննարկում են Միացյալ Նահանգների քաղաքացիների համար անհրաժեշտ չհանդիսացող պատվաստանյութերն այլ պետությունների հատկացնելու հնարավորությունը։