Казанда трамвайлар бәрелешендә зыян күргән ир-атның аягын кискәннәр
(Казан, 18 май, «Татар-информ»). Казанда табиблар ике трамвай бәрелешендә зыян күргән ир-атның аягын ампутацияләргә мәҗбүр була. Бу хакта «Татар-информ» корреспондентына 7нче Казан хастаханәсе матбугат хезмәтендә хәбәр иттеләр. Элегрәк агентлык аякны саклап калу операциясе берничә сәгать дәвам итеп, уңышлы узганлыгын хәбәр иткән иде. «Кызганыч, хәл үзгәрде. Абсцесс башланды», - диделәр клиникада. Хастаханәнең матбугат хезмәтендә сөйләүләренчә, ир-атның аягы ныгып китмәгән. Исегезгә төшерәбез, кичә Себер трактында Казанда ике трамвай бәрелеште. Моның сәбәбе - аларның берсе дистанцияне сакламаган. Юл-транспорт һәлакәтендә дүрт кеше зыян күргән - ике трамвай йөртүче һәм ике кондуктор. 50 яшьлек ир-ат бик авыр җәрәхәт алган – аның аягы өзелеп чыга язган.
