(Казан, 18 май, «Татар-информ»). Башкортстанның Туймазы районы Төмәнәк авылында урнашкан «Бабай утары» тарихи-туган якны өйрәнү комплексында агач сыннар ясаучылар фестивале була. Бөтендөнья татар конгрессының матбугат хезмәте хәбәр иткәнчә, фестиваль «Татар халык әкиятләре персонажлары» дигән темага багышлана. Оештыручылары - «Төмәнәк» Татар иҗтимагый үзәге һәм Бөтендөнья татар конгрессы каршындагы «Россиянең татар авыллары» Бөтенроссия оешмасы. Фестивальнең максаты һәм бурычлары татар халык гамәли сәнгатен үстерү һәм аңа ярдәм күрсәтү, халык иҗатын, ландшафт скульптурасын популярлаштыру, халык осталары, рәссамнар белән элемтәләрне ныгытудан гыйбарәт. Конкурста бер яки ике кеше катнаша. Ул гаризадагы эскизы нигезендә – бер эшләнмә, яки озынлыгы – 4 метр, диаметры 0,6-0,8 метр тәшкил иткән бүрәнәдән кешеләр, хайваннар, әкият персонажлары рәвешендә скульптур композицияләр ясый. Конкурсантларның эшләнмәләре «Бабай утары» фестивале тематикасын чагылдырырга тиеш. Бәйгедә катнашу өчен гаризалар 1 июльгә кадәр кабул ителә.
