«1944 senesi mayıs 18-i devam ete»: Qırımda qırımtatar halqı genotsidiniñ yıllığına bağışlanğan fleşmob keçirile (+foto)
Qırımtatarlar 1944 senesiniñ faciası ve devam etken repressiyalar aqqında hatırlatqan yazuvlı şiarlarnen fotoresim çıqara. Fotolarnı içtimaiy ağlarda paylaşalar.
«1944 senesi mayıs 18-i alâ daa devam ete», «Biz ununtmadıq. Balalarımız unutmaycaq», «Qırımtatarlar Rusiye Federatsiyasınıñ apishanelerine sürgün etilmemeli. 1944 – satqınlar, 2014 – terroristler», «1944 – 2021. Repressiyalarnı kim toqtatacaq?», «Qorantalarğa qarşı repressiyalarğa STOP», – dep aytıla yazuvlı şiarlarda.
«Fotoresimde şimdi yaşağan evimiz miras ola. Qartbabam 1944 senesi sürgün etilgende Bağçasaray rayonında yaşağan edi ve 90-larda Qırımğa qaytıp, öz evine yerleşip olamadı ve bu evni saylap aldı… Bir yıl evelsi qorantamız buña oşağan bir şey yaşadı. Kirli çızma saba erte evine sürip kire ve evinde saip kibi areket ete. Bizim ailemiz de o is, o duyğularnı yaşap kördi. E, sürgünlik degil. Amma oña oşağan bir şey, çünki qorantamız buña oğradı», – dep ayttı fleşmob iştirakçilerinden biri, Bağçasaraydaki üçünci «Hizb ut-Tahrir davasınıñ» mabüsi Amet Suleymanovnıñ ömür arqadaşı Lilâ Lümanova.
Aqmescitte mayısnıñ 18-nde Lenin bulvarında, tren vokzalı yanında, qırımtatar halqı genotsidiniñ qurbanları hatırasına tedbirler keçirildi. Qırımtatar faalleriniñ aytqanına köre, tedbirler adet üzre keçirilgen abide yanında Rusiye polisi bar edi.
Mayısnıñ 18-i arfesinde qırımtatar faallerini polis tenbiledi.
Bugün Ukraina ve dünyada qırımtatar halqı genotsidiniñ qurbanları añıla. Ukraina prezidenti Volodımır Zelenskıy Ukraina akimiyeti Qırım yarımadasını kontrol altına qaytarmaq içün ğayret köstere, dep qayd etti.
Qırımtatar halqı genotsidiniñ qurbanları Ukrainanıñ Türkiye elçihanesinde de añıldı, matem şeritli qırımtatar bayrağı endirildi, dep bildirdi Ukrainanıñ Türkiye elçisi Andriy Sıbiğa. Türkiye Tış işler nazirligi qırımtatarlarğa qol tutmağa ve «Qırımnıñ qanunsız ilhaqından soñ zulumnı toqtatmağa tırışmağa» devam etecek, dep bildirdi.
Mayıs 18 qırımtatar genotsidiniñ qurbanlarını añma yılına Kanadanıñ New Brunswic vilâyetiniñ paytahtı Fredericton Ukrainanıñ Kanada elçihanesiniñ teşebbüsine qoşulıp, qırımtatar bayrağını köterdi. Bayraq Ukraina devlet bayrağınen beraber Fredericton meriyası ögünde asıldı.
Kyivdeki «Qırım evinde» bugün «Tañ» («Svitanok») installâtsiyası açılacaq. Mayısnıñ 18-nde qırımtatar genotsidiniñ qurbanlarını añma tedbirlerinde Latviya Seyminiñ spikeri Ināra Mūrniece iştirak etmege niyetlene.
Qırımtatar Milliy Meclisi mayısnıñ 18-nde eglenceli tedbir keçirmemege çağırdı. «Qırımtatar resurs merkezi» ise «Genotsid olmasın!» adlı informatsion kampaniyanı başlattı.
Ukraina prezidentiniñ Qırım Muhtar Cumhuriyeti ve Aqyar temsilciligi ocalarnı ve gençlik merkezleriniñ ocalarını mayısnıñ 18-nde Qırımtatar halqı genotsidiniñ qurbanları hatırasına ders keçirmelerine çağırdı.