Türkiye qırımtatarlarnıñ amanlığı içün olarnıñ yanında olmağa devam etecek – Tış işler nazirligi
«1944 senesi mayıs 18 gecesi 250 biñ qırımtatarı insanlıq tışı şaraitlerde sürgün etilip, ana vatanlarından qoparılğan edi. Bu facialı adisede qırımtatarlarnıñ büyük qısmı can berdi, sağ qalğanlar ise ana vatan asretinen yaşamağa mecbur edi. Türkiye, sürgülikten 77 yıldan soñ, Qırımnıñ qanunsız ilhaqından peyda olğan zorluqlarnen sınanmağa devam etken qırımtatarlarnıñ zulumlarınıñ toqtatılması, kimlikleriniñ qorunması, aman-esen qalmaları içün soydaşlarımıznıñ yanında olmağa devam etecektir», – dep aytıla Türkiye Tış işler nazirliginiñ beyanatında.
Salı künü, mayısnıñ 18-nde, sovetler qırımtatarlarnı Qırımdan sürgün etip başlağanına 77 yıl tola. Ukraina ve dünyada qırımtatar halqı genotsidiniñ qurbanları añıla.
Mayısnıñ 18-nde qırımtatar genotsidiniñ yılında Ukrainanıñ Türkiye elçihanesi matem şeritli qırımtatar bayrağını endirdi.
Qayd etmeli ki, mayıs 18 qırımtatar genotsidiniñ qurbanlarını añma yılına Kanadanıñ New Brunswic vilâyetiniñ paytahtı Fredericton Ukrainanıñ Kanada elçihanesiniñ teşebbüsine qoşulıp, qırımtatar bayrağını köterdi. Bayraq Ukraina devlet bayrağınen beraber Fredericton meriyası ögünde asıldı.
Qırımnıñ farqlı şeer ve rayonlarında qırımtatar halqı genotsidiniñ qurbanları hatırasına tedbirler keçirile.
Kyivdeki «Qırım evinde» bugün «Tañ» («Svitanok») installâtsiyası açılacaq. Mayısnıñ 18-nde qırımtatar genotsidiniñ qurbanlarını añma tedbirlerinde Latviya Seyminiñ spikeri Ināra Mūrniece iştirak etmege niyetlene.
Qırımtatar Milliy Meclisi mayısnıñ 18-nde eglenceli tedbir keçirmemege çağırdı. «Qırımtatar resurs merkezi» ise «Genotsid olmasın!» adlı informatsion kampaniyanı başlattı.
Ukraina prezidentiniñ Qırım Muhtar Cumhuriyeti ve Aqyar temsilciligi ocalarnı ve gençlik merkezleriniñ ocalarını mayısnıñ 18-nde Qırımtatar halqı genotsidiniñ qurbanları hatırasına ders keçirmelerine çağırdı.