Qırımtatar halqınıñ milliy lideri Mustafa Cemilev 1943 senesi noyabrniñ 13-nde Bozköy köyünde dünyağa keldi. Ana-babası bu köyge Ay-Serezden sürgün etilgen edi. Şimdiki adı Mejdureçye olğan Ay-Serezni Cemilev öz soy köyü olaraq saya. O, Qırımnıñ cenübiy-şarqında, Sudaq yaqınlarında yerleşmekte. «Ay-Serez qadimiy yunan tilinde «Aziz Sergiy» demektir. Bütün meskün yerlerniñ adları deñiştirilgende bunı qırımtatar adı sayıp, Mejdureçye adını bergendirler», – dep tarif ete Mustafa Cemilev Qırım.Aqiqatqa. Qırımtatar halqı genotsidiniñ qurbanlarını añma künü munasebetinen meşur qırımlılar tuvğan yerleri ve 1944 senesi sürgünliginden evelki vaziyeti aqqında tarif ete.
