ЕИ Беларусь иқтисодиётига қарши секторал санкцияларни жорий қилди
Янги санкциялар телефон алоқаси ва интернет трафигини мониторинг қилиш ёки тутиб олишга мўлжалланган жиҳозлар ва технологияларни Беларусь ҳукуматига сотиш, бериш ёки экспорт қилишни ман этади.
Худди шундай тақиқ ҳарбий мақсадларда фойдаланишга яроқли икки хил вазифани бажарувчи маҳсулотларга нисбатан ҳам жорий қилинган.
ЕИ Беларусь ҳукуматини, ҳокимият органларини ва давлат хизматларини суғурталаш ва қайта суғурталашни ман қилади, Европа инвестициялар банкига Беларусь давлат секторидаги лойиҳаларни молиялашни тақиқлайди ва ЕИ аъзоларидан тараққиёт банкларининг ушбу мамлакат лойиҳаларидаги иштирокини чеклашни талаб қилади.
Шунингдек, нефть маҳсулотлари, калийли ўғитлар ва тамаки маҳсулотлари ишлаб чиқариш учун зарур товарлар билан савдо қилишга чеклов ўрнатилмоқда. Бироқ, Беларусь бюджетини тўлдиришда ва Александр Лукашенко атрофида бўлган шахслар учун ўта муҳим эканига қарамай, ушбу соҳаларда тўлиқ тақиқ жорий этилмаяпти.
Ўтган ҳафтада Евроиттифоқ Минскка қарши 2020 йилги президент сайловларидан кейинги тўртинчи персонал санкциялар туркумини қабул қилган. “Қора рўйхат”га 78 киши, жумладан, Лукашенконинг яқин мулозимлари ва қариндошлари ҳамда МАЗ, БелАЗ, “Белаэронавигация” каби саккиз ширкат кирган — уларнинг ЕИ ҳудудидаги активлари “музлатилади”.
ЕИ ортидан Лукашенко режимига алоқадор жисмоний ва юридик шахсларга қарши санкциялар АҚШ, Канада ва Буюк Британия томонидан ҳам жорий қилинган.
Беларусь президенти ўзига қарши Ғарб санкцияларининг янги туркумига изоҳ бераркан, ҳамкорлик қилиш учун дунёда ЕИ мамлакатларидан бошқа давлатлар ҳам етарлилигини айтган.