Чацвёртыя суткі праблемы з вадой у Ляхавічах

Сур’ёзныя праблемы з вадой у Ляхавічах працягваюцца чацвёртыя суткі. Жыхары Ляхавічаў скардзяцца на праблемы з вадой, якія пачаліся 21 чэрвеня, – піша Intex-press.

У многіх раёнах горада няма ні гарачай, ні халоднай, у іншых — яна з’яўляецца на некалькі гадзін у дзень. Тым часам гараджане кажуць, што з бутыляванай вадой у крамах ужо таксама ёсць праблемы — месцамі можна купіць толькі мінеральную ваду.

У Ляхавіцкім раённым ЖКГ праблемы з вадой тлумачаць спякотай, бо ў водазаборы не хапае вады. А на водаканале ва ўсім вінавацяць саміх жыхароў, якія ў спякоту паліваюць свае гароды.

Бліжэйшым часам ваду ў Ляхавічах будуць уключаць тройчы ў дзень: з 6-й да 8-й раніцы, удзень з 12-й да 14-й, а ўвечары — з 17:30 да 23:00. Папярэдне, ваду паводле графіку ў Ляхавічах будуць даваць да 27 чэрвеня. Таксама гараджан просяць эканоміць ваду і не паліваць агароды са шлангаў.

Беларускае Радыё Рацыя

Фота: Intex-press