Сафію Сапега і Рамана Пратасевіча перавялі пад хатні арышт

Рамана Пратасевіча і Сафію Сапегу, затрыманых 23 траўня ў Менску ў выніку пасадкі самалёта Ryanair Афіны — Вільня, перавялі пад хатні арышт. Пра гэта паведамляе BBC са спасылкай на бацькоў.

“Мне складана каментаваць дзеянні ўладаў, якія ў іх мэты, – сказаў Дзмітрый Пратасевіч, бацька Рамана. — Яны ўсё роўна пад поўным кантролем уладаў, абвінавачванні з іх ніхто не зняў”. Па словах бацькі, адвакаты і ўлады па-ранейшаму нічога не паведамляюць сям’і. “Нам нічога не кажуць пра стан Ромы, статус, гэта проста здзек”, – сказаў ён.

Паведамляецца, што Сафія жыве адна ў здымнай кватэры ў Менску. Іншых падрабязнасцей пакуль няма. Паводле адваката Сафіі Сапегі – Антона Гашынскага – дзяўчыне далі магчымасць сустрэцца з бацькамі ў кавярні. Адвакат не выключае, што яна вернецца дадому ў Расею, Сафія – грамадзянка Расеі.