ბობოყვათის სანაპიროსთან მიწის გასხვისებაზე აუქციონი ჩაიშალა
28,5 ჰექტარ მიწის ნაკვეთზე აჭარის ფინანსთა და ეკონომიკის სამინისტრომ აუქციონი მიმდინარე თვის დასაწყისში გამოაცხადა 250 მილიონი ლარის ინვესტიციის პირობით. ინვესტორს ევალებოდა, რომ ვილები და თანამედროვე სტანდარტების სასტუმროები აეშენებინა.
აუქციონს ეწინააღმდეგება ბობოყვათში მცხოვრები 70-ზე მეტი ოჯახი. ისინი აცხადებენ, რომ ეს მიწა მათი წინაპრების საკუთრებაა, რომელიც ბოლშევიკურმა მთავრობამ ჩამოართვა, დამოუკიდებელი საქართველოს ხელისუფლებამ კი არ დაუბრუნა.
მიწების საკუთრებაში დაბრუნების მოთხოვნით რამდენიმე კვირაა ბობოყვათელები ხმაურიან საპროტესტო აქციებს მართავენ. მათ კარავი აქვთ გაშლილი სადავო ტერიტორიაზე და აუქციონის გაუქმებას ითხოვდნენ. აჭარის ადგილობრივი ხელისუფლება აცხადებს, რომ მიწა სახელმწიფო საკუთრებაა და აუქციონიც კანონის შესაბამისად გამოცხადდა.