Թաիլանդում թութակը հայտնվել է տիրուհու զարդատուփում ու 21 ադամանդ կուլ տվել
Թաիլանդական Բանգկոկում թութակը կուլ է տվել տիրուհու ադամանդյա վզնոցից 21 ադամանդ: Ըստ Metro–ի ՝ թռչնի մարմնից թանկարժեք քարերը դուրս են բերվել ընդհանուր անզգայացման տակ:
Դեպքը տեղի է ունեցել հունիսի 22-ին: Ութ ամսական Ֆրոսթին հայտնվել է տիրուհու զարդատուփում և կուլ տվել ադամանդները: Դրանից հետո թռչունը թուլացել է և այլևս չի ցանկացել ուտել: Թութակին տեղափոխել են անասնաբուժական կլինիկա, կատարել են ռենտգեն հետազոտություն, որը ցույց է տվել, որ թռչնի ստամոքսում օտար մարմիններ կան:
Ֆրոսթիի ստամոքսը բացել են և դուրս բերել 0,2 կարատ քաշով 21 քար:
«Այս թռչուններին գրավում են փայլուն բաները: Մենք հաճախ նման իրավիճակների ենք հանդիպում, բայց այս դեպքն առանձնահատուկ է, քանի որ թութակը շատ ադամանդ է կերել», - ասել է անասնաբույժը: