Табиб «Спутник Лайт» препараты белән вакцинация кемгә туры килүе турында сөйләде
(Казан, 25 июнь, «Татар-информ»). Covid-19 инфекциясеннән теркәлгән дүртенче «Спутник Лайт» вакцинасы 25 июньдә гражданнар әйләнешенә керә. Табиб-биофизик, Vakcina.ru проектның әйдәп баручы белгече Нелли Соседова Sputnik радиосына бер компонентлы препарат белән вакцинация кемгә туры киләчәге турында сөйләде. «Ревакцинация башлана. Ул авырып терелгән яки прививканы бер ел яки сигез айлап элек алган кешеләргә кагыла. Антитәнчекләр кими, яңа штамм барлыкка килде, шуңа күрә иммунитетны көчәйтергә кирәк», — дип аңлатты Соседова һәм әлеге препарат «Спутник V» вакцинасын алган кешеләргә аеруча туры килүен әйтте. Табиб ковидның Һиндстан яңа штаммы таралу шартларында ревакцинация аеруча актуаль булуын искәртте. Прививка ясаткан кешеләрнең иммунитеты коронавирус белән авырганнан соң табигый юл белән булдырыла торган иммунитетка караганда күпкә ышанычлырак, дип өстәде Соседова. «Спутник Лайт» — Гамалея исемендәге үзәктә эшләнгән бер компонентлы вакцина, аны РФ Сәламәтлек саклау министрлыгы 2021 елның 6 маенда теркәде. Россия турыдан-туры инвестицияләр фондында аның нәтиҗәлелеге ике этапта кертелә торган башка вакцина күрсәткечләреннән 80 процентка артып китә, дип искәрттеләр. Элегрәк РФ Президенты матбугат секретаре Дмитрий Песков якын арада «Спутник Лайт» вакцинасы белән прививка ясатырга җыенуын белдерде.
