Миңнеханов һәм Титов ковид пандемиясе чорында үзмәшгульләргә ярдәм турында сөйләште
(Казан, 25 июнь, «Татар-информ»). Татарстан Президенты Рөстәм Миңнеханов РФ бизнес-омбудсмены Борис Титов белән очрашты. Яклар Татарстанда бизнеска административ басымны киметү, шулай ук эшмәкәрләргә грант ярдәме күрсәтү өчен үткәрелә торган эш турында фикер алышты, дип хәбәр итә ТР Президентының матбугат хезмәте. Рөстәм Миңнеханов Татарстанда үзмәшгуль һәм социаль эшмәкәрләргә ярдәм итүгә аеруча зур игътибар бирелүе турында сөйләде. Әйтик, республикада тармак принцибы буенча бизнесменнар белән онлайн-очрашулар үткәрелә. Мондый формат өстәмә ярдәм чаралары турында карар кабул итәргә һәм хәтта коронавирус пандемиясе чорында да Министрлар Кабинеты адресына инициативаларны формалаштырырга мөмкинлек бирде. Татарстанда эшмәкәрләр хокукларын яклау буенча вәкаләтле вәкил институты бизнесменнардан меңләгән мөрәҗәгать ала, бу тармак үсешенә комачаулаучы проблемаларны ачыкларга, аларны хәл итү өчен тәкъдимнәр әзерләргә ярдәм итә. Очрашу Казан Кремлендә узды. Исегезгә төшерәбез, Борис Титов Татарстанга эш сәфәре белән килде һәм «Төбәк үсеше: нәтиҗәле карарлар эзләү» форумында катнаша. Кичә омбудсмен Чаллының сәнәгать паркларының берсен карады.
