«Երկու հայկական պետությունների ղեկավարները որևէ կերպ չանդրադարձան անվտանգային հարցերին, այն պարագայում, երբ Արցախը շրջապատված է թշնամիներով»
«Դա նորություն չէ, որ այս իշխանությունների համար այլևս Արցախի հարց գոյություն չունի, Արցախ կամ Լեռնային Ղարաբաղ էլ չես լսի նրանց շուրթերից, կամ մաքսիմում կասեն Ղարաբաղ: Նրանք փաստել են, որ չկա Արցախի հարց, և պարզ է, որ այդպիսի հանձնաժողով չէին էլ ստեղծելու, բայց իհարկե այդպիսի հանձնաժողով ստեղծելու կարիք կա: Եթե նախկինում չկար, որովհետև առնվազն բանակցային գործընթացում վիճակը կայուն էր, հիմա ուղղակի անհրաժեշտություն է, որ գոնե ԱԺ ամբիոնից հնչեցվեր Արցախի անունը, խոսվեր Արցախի մասին, որպեսզի աշխարհը լսեր, որ Հայաստանը չի մոռացել, և Հայաստանը ինչպես եղել է Արցախի անվտանգության երաշխավորը, այդպես էլ մնում է:
Երբ Հայաստանի իշխանությունները կճանաչեն Ադրբեջանի տարածքային ամբողջականությունը, իրենք դրանով ձեռքերը կլվանան և ձեռք կքաշեն Արցախից»,-ԳԱԼԱ-ի հետ զրույցում նման կարծիք հայտնեց Արցախի ԱԺ «Արդարություն» կուսակցության պատգամավոր Մետաքսե Հակոբյանը:
«Այն, որ մենք 30 տարի ունեինք Արցախի համար ամենահզոր անվտանգության երաշխավորը, և դա փոխադարձ էր՝ Հայաստանը Արցախի համար և Արցախը Հայաստանի համար, մենք փաստորեն զրկվում ենք դրանից, և ստացվում է, որ հայկական երկու պետություններից մեկն ուղղակի հրաժարվում է մյուս պետությունից, որը միշտ հայ ազգի համար գաղափարախոսություն է եղել։
Այն կասկածները, որ մենք ունեինք, շատ շուտով իրականանալու են, և իրավական առումով Հայաստանը ուղղակի ձեռքերը կքաշի Արցախից»,- նշեց պատգամավորը:
Օրերս Արցախի նախագահ Արայիկ Հարությունյանը Երևանում հանդիպեց Լևոն Տեր-Պետրոսյանի, պաշտպանության նախարարի հետ, մինչ Երևան մեկնելը Հարությունյանը Մարտակերտում ասել էր, որ տարածաշրջանում իրավիճակն այնպիսին է, որ Արցախը միայնակ չի կարող ապահովել խաղաղություն և անվտանգություն, իսկ ռուսական զորքերի ներկայությունը չպետք է լինի ժամանակավոր, այլ մշտական: Ինչպե՞ս եք մեկնաբանում ԱՀ նախագահի այս հայտարարությունը:
Մետաքսե Հակոբյանը, անդրադառնալով ԱՀ նախագահի հայտարարություններին, նշեց. «Արայիկ Հարությունյանն ընդամենը 2 րոպե խոսեց իբր անվտանգության մասին, որովհետև այդ մարդն ընդհանրապես չի հասկանում՝ ինչ է նշանակում երկրի անվտանգություն:
Նա ընդամենը մեկ տարի առաջ ամպագոռգոռ հայտարարություններ էր անում, որ ինքը Արցախի անվտանգության երաշխավորն է, պատասխանատուն և ինքը ավելի շատ ինքնասպան կլինի, քան թե կհրաժարվի այդ գաղափարից: Ամիսներ անց նա խոսեց լրիվ հակառակը: Հիմա նա հոխորտում է, որովհետև Նիկոլ Փաշինյանի ընտրվելուց հետո ավելի ինքնավստահ է դարձել, բայց փող աշխատելու մեջ, և այսօր Արցախը վերածել է շինհրապարակի:
Այսօր Արցախում ջուր չկա, Ստեփանակերտ քաղաքը մոտ մեկ շաբաթ է ջրազուրկ է, և դա բացարձակ իրենց չի հետաքրքրում, իրենք հիմա գումար են աշխատում:
Իրենց համար բնականաբար խնդիր չէ նաև անվտանգային հարցերը:
Նրա այցը Երևան իր հայտարարությունների տրամաբանական շարունակությունն էր: Արայիկ Հարությունյանը հանդիպեց նախկին, ամենագլխավոր չարագործ Լևոն Տեր-Պետրոսյանի հետ: Ձևականորեն հանդիպեց պաշտպանության նախարարի հետ և հանդիպեց Նիկոլ Փաշինյանի հետ և որևէ անվտանգային հարց, որը վերաբերում էր Արցախին, չքննարկվեց:
Խոսքը գնաց միայն սոցիալական, շինարարական, տնտեսական խնդիրների մասին: Բնականաբար պատերազմից հետո դրանց կարիքը շատ է, որովհետև այն իբր սոցիալական ծրագրերը, որոնք իրականացվում են, ըստ էության, Արցախում որևէ սոցիալական խնդիր չեն լուծել, որևէ գլոբալ խնդիր լուծված չէ Արցախում:
Երկու հայկական պետությունների ղեկավարները որևէ կերպ չանդրադարձան անվտանգային հարցերին: Այն պարագայում, երբ Արցախը շրջապատված է թշնամիներով, և բացի շրջապատված լինելուց՝ մեր վերահսկողության տակ գտնվող Արցախի մյուս հատվածով ամբողջ օրը ադրբեջանցիները անցնում-դառնում են, իրենց լկտի են պահում: Ստեփանակերտից դուրս ես գալիս և կարճ ճանապարհ անցնելուց հետո դրա ականատեսն ես լինում:
Իսկ երկու հայկական պետությունների դավադիր ղեկավարներն իրենց պահում են այնպես, կարծես նման բան չկա, Հայաստանն այսօր վտանգի մեջ չէ, Արցախը հանձնված չէ և այսօր միակ խնդիրը բարգավաճելն ու սոցիալական հարցերն են:
Ես հույս ունեմ, որ Հայաստանում ընդդիմությունը կկարողանա ճիշտ, քաղաքական հստակ քայլերով ազատվել այս իշխանությունից:
Ինչ վերաբերում է ռուս խաղաղապահների ներկայությանը Արցախում, իհարկե նրանց գործոնը շատ մեծ է, այսօր մեր ոտքի կանգնելու շրջանում ռուս խաղաղապահների արածն ուղղակի անգնահատելի է: Այն գործառույթները, որ նրանք են իրականացնում, նրանց չանելու դեպքում այսօր ադրբեջանցիները Ստեփանակերտում մեր կողքով քայլելու էին և անվրդով փորձելու էին ապրել»,- ընդգծեց Հակոբյանը:
8-րդ գումարման ԱԺ նիստերը օգոստոսի 2-ից մեկնարկել են, բայց տպավորություն է, որ այնտեղ ավելի շատ հաշիվներ են պարզում, քան աշխատում: Հայաստանի ներքաղաքական իրավիճակով պայմանավորված՝ ի՞նչ մտահոգություններ կան Արցախում:
Հարցադրմանն ի պատասխան՝ Արցախի ԱԺ «Արդարություն» կուսակցության պատգամավորը հայտարարեց.
«Ընդդիմությունը պետք է շատ կոշտ լինի, այս իշխանության հետ չես կարող կառուցողական լինել, որովհետև դա տանելու է Թուրքիայի հետ մերձեցման, ըստ իրենց այն գաղափարախոսության տարածմանը, որ թուրքը մեր թշնամին չէ, որ պետք է հարմարվել ու ապրել թուրքերի հետ: Այսինքն՝ կառուցողականը դա պիտի լինի, և այս պարագայում ընդդիմությունը պիտի շատ կոշտ լինի:
Պատերազմի ընթացքում իշխող կուսակցությունը մեկ շաբաթով Արցախում էր, ընդամենը մեկ անգամ մեզ հետ հանդիպում ունեցան, և հասկացանք, որ նրանց հետ որևէ քննարկում չի ստացվի:
Նրանք եկել էին Արցախ ուղղակի նկարվելու, ապահով վայրում էին, բայց քաղաքացիներին ցույց էին տալիս, որ իրենք առաջնագծում են:
Այդ նույն Լուսինե Բադալյանը իրեն այդ օրերին Արցախում շատ լավ էր զգում, բայց ԱԺ ամբիոնից այն օրը այնպես էր հոխորտում, որ ինքը ամեն բան արել է Արցախը փրկելու համար, բայց նա պատերազմի թեժ պահին ապահով վայրում նկարվում էր:
Լինելու է այն սցենարը, ինչը իշխանությունը որոշել է, ցավոք սրտի, ընդդիմությունը դեռևս փոքրաքանակ լինելով՝ այս պահին չի կարող ինչ-որ բան անել կամ փոխել: Այն սցենարը, որի մասին Ալիևը մեկ ամիս առաջ է խոսել, իշխանությունը շարժվելու է այդ սցենարի ձևաչափով: Ընդդիմությունը պետք է անընդհատ խոսի և ցույց տա այս իշխանությունների վարած դավադիր քաղաքականությունը, որի արդյունքում հանձնեցին Արցախը, մենք հազարավոր զոհեր ունենք, հիմա էլ համարում են, որ լուծել են Արցախի հարցը:
Հիմա էլ անցել են Հայաստանի կարևոր ռազմավարական նշանակություն ունեցող տարածքների հանձնելուն և ամենակարևորը «Մեղրիի միջանցքը» տալու գործընթացին, որը արտաքին քաղաքականության մեջ ամենագլխավոր նշանակությունն է ունենալու Թուրքիայի համար և ամենամեծ հաղթանակը, որը կնվիրի Նիկոլ Փաշինյանը»,- եզրափակեց Արցախի ԱԺ պատգամավոր Մետաքսե Հակոբյանը:
Անահիտ Չալիկյան
The post «Երկու հայկական պետությունների ղեկավարները որևէ կերպ չանդրադարձան անվտանգային հարցերին, այն պարագայում, երբ Արցախը շրջապատված է թշնամիներով» appeared first on ԳԱԼԱ.