Реконструкциядән соң "Яшьлек" спорткомплексы ачылды
Бүген шәһәребездә "Татнефть" ярдәме белән реконструкцияләнгән "Яшьлек" спорткомплексын тантаналы рәвештә ачу чарасы булды.
Анда "Татнефть" җәмгыяте генераль директоры Наил Маганов, район башлыгы Рәгать Хөсәенов, "Лениногорскнефть" идарәсе начальнигы Рафаил Нурмөхәммәтов катнашты. Бу көн чын мәгънәсендә спорт бәйрәменә әверелде. Яңартылган спортзалда лениногорскилылар волейбол уйнады. Аерым мәйданчыкларда яшьләр урам баскетболы, теннис уйнады, иң җитезләр йөгерүдә көч сынашты. "Лениногорскнефть" идарәсенең җыелма футбол командасы "Җәлил" поселогыннан килгән кунаклар белән зур футбол кырында очрашты. Алар өчен җан атып торучылар да шактый җыелган иде.
Наил Маганов Лениногорскиның электән үк спорт шәһәре булуын әйтеп, хәзер спорт белән шөгыльләнү өчен бөтен мөмкинлекләр дә тудырылган булуын, яшьләрне актив булырга өндәде.
Рәгать Хөсәенов Наил Магановның "Лениногорск шәһәре һәм районының мактаулы гражданины" булуын хәбәр итеп, әлеге таныклыкны тапшырды.
Шулай ук бу көнне талантлы Лениногорск яшьләре концерт та куйды.
Любовь Майорова фотолары