Святлана Ціханоўская сустрэлася з беларусамі Амстэрдама і Вены
Дэмакратычныя сілы апублікавалі план на дзень галасавання наконт новай Канстытуцыі. Яны заклікаюць далучыцца да стратэгіі дзеянняў, якую распрацавалі грамадзянскія ініцыятывы «Сумленныя людзі», Zubr, платформа «Голас» пры ўдзеле Офіса Святланы Ціханоўскай, Народнага антыкрызіснага кіраўніцтва і Каардынацыйнай рады. У апублікаваным звароце гаворыцца, што рэферэндум — «злачынства і падман, якое мы, беларусы, ператворым у „вотум недаверу“ рэжыму».
– Мы не дазволім зноў навязаць беларусам маўчанне. Бо менавіта таму, што мы не сталі маўчаць у 2020, рэжым зноў вымушаны нас пытацца. І нават, калі нас не жадаюць слухаць, мы будзем казаць гучна. Мы будзем дзейнічаць!
Разам са Святланай Ціханоўскай ініцыятывы „Сумленныя людзі“, „Зубр“, „Голас“ заклікаюць прыходзіць на ўчасткі і рабіць бюлетэнь несапраўдным. А менавіта паставіць крыжыкі насупраць усіх прапанаваных у бюлетэні варыянтаў.
Дадамо, што Святлана Ціханоўская сустрэлася з беларусамі Амстэрдама і Вены.
Па словах Святланы, палітыкі, з якімі яна сустракаецца, не адчуваюць боль беларусаў на сто адсоткаў. Цытата: «Ім невядома, што такое правесці амаль год у адзіночнай камеры ў калоніі, як Марыя Калеснікава, ці трымаць галадоўку ў пратэст супраць затрымання, як Вольга Гарбунова».
Ціханоўская заклікала пісаць лісты палітвязням і рабіць рэгулярныя ахвяраванні ў фонды салідарнасці. Па стане на 21 лістапада ў Беларусі прызнаныя палітычнымі вязнямі 876 чалавек.
Беларускае Радыё Рацыя
Фота: tsikhanouskaya.org