Мәскәүдә – “Голос”, Әлмәттә – “Ачык Микрофон”
Беренче каналда “Голос”, “Россия” каналында “Главная сцена” старт алса, бездә “Ачык микрофон” (“Открытый микрофон”) проекты яшь талантларга юл ача башлады.
Сәнгать дөньясында үз исемнәрен танытырга һәм тәҗрибә тупларга теләүчеләр өчен искиткеч мөмкинлек ачылды – үзәк телеканаллардан матурлыгы, артистлык осталыгы һәм серлелеге буенча һич кенә дә калышмаучы проект яшь талантларны барлый. Әмма аның зур өстенлеге бар, ул җыр дөньясы белән генә чикләнми.
.jpg)
– “Ачык микрофон”да теләге булган һәркем катнаша ала, – ди идея авторы Руслан Бажутов. – Бездә жанрларда чикләүләр юк, stand up, вокал, миниатюра, шигырь уку, инструментта уйнау – кем нәрсәне үз итә – рәхәтләнеп чыгыш ясый ала. Аның максаты да бит иҗади яшьләрне үстерү, аралашу, яңа танышулар булдырудан гыйбарәт.
Руслан, беренче чиратта, өйдә кул кушып утыручы һәм сәхнәгә чыгарга хыялланучыларга мөрәҗәгать итә.
– Бер китапта язылганча, “Эш-гамәлне башларга җөрьят итмәгәндә, ялкаулыкны һәм дисциплина юклыгын гаепләмәгез. Монда фәкать курку хисегез генә гаепле”. Бу – хакыйкать. Безнең беребез дә ялкау түгел, бары тик үзебезнең көчкә ышанмаудан гына каушап торабыз. Башка төрле фикер йөртергә кирәк: әгәр дә сәхнәгә күтәрелеп сез үзегезне сынап карыйсыз икән, моның өчен беркем дә сезне “сугып екмаячак”. Иҗатны һәрчак камилләштерергә була. Бары тик үз өстеңдә эшләргә генә кирәк.
– Руслан, проектта катнашучыларны нинди киләчәк көтә? Чыгышлар “Ачык микрофон” белән генә чикләнәме, әллә сезнең башка планнарыгыз да бармы?
– Беренчедән, без һәркемгә кече аудитория алдында чыгыш ясарга мөмкинлек бирәбез. Әмма проектта катнаштың да, кайтып киттең түгел. Мәртәбәле жюри үз киңәшләре, теләкләре белән уртаклашачак. Ә бу яшьләргә тәҗрибә, һөнәри осталык туплауда зур ярдәм булачак. Аннан соң иң яхшылар дип табылганнар шәһәребезнең зур сәхнәләренә чыгуга ирешәчәк.
– Ә проектны бер генә тапкыр уздыруга йөз тотасызмы?
– Аның беренчесе үтте инде (Гаҗәп, без бу хакта белми дә калганбыз. Массакүләм мәгълүмат чараларында яктыртылмаган чара узмаган дип санала диюләре хак икән – Г.Г.). Жюри вәкилләре: “Постройка+” журналы директоры Марина Гайнутдинова, талантлы җырчы Евгений Макитрук, “Mamina” студиясенең вокал буенча педагогы Наталья Александровалар күп яшьләргә сәнгать дөньясына юл ачты инде. Менә хәзер икенчесенә әзерләнәбез. Проектны, гомумән, ешрак уздырырга исәплибез. Чөнки талантлы яшьләр күп, һәрберсен тыңлыйсы, халыкка чыгарасы килә. “Ачык микрофон”га эләгергә теләүчеләр “ВКонтакте” социаль челтәрендәге махсус төркемдә гариза калдыра ала.
Русланның сүзләрен җөпләп, үземнән бары шуны гына өстисем килә, “Голос”та кемнәр чыгыш ясый? Нәкъ безнең кебек гади, провинциядән килгән һәм, әлбәттә, сәләтле яшьләр. Алар да бит беренче адымнарын кечкенә шәһәрләрендә ясаган. Бәлки “Ачык микрофон” Мәскәү сәхнәсенә күтәрелүгә беренче баскычтыр?!
Гөлназ ГЫЙЗЗӘТУЛЛИНА