«Намойишларда ҳалок бўлган 225 кишининг жасади ўликхоналарга етказилган» – Қозоғистонда бўлган намойиш қурбонлари сони очиқланди

Қозоғистон Бош прокуратурасига кўра, ўтган ҳафтадаги намойишларда ҳалок бўлган 225 кишининг жасади ўликхоналарга етказилган. Улар орасида 19 нафар хавфсизлик кучлари ходими ҳам бор.

Бу рақам оддий одамларни ҳам, полиция ўқидан ўлган қуролланган “бандитлар”ни ҳам ўз ичига олади, дейди прокуратура вакили Серик Шалабаев. Рақамлар кейинроқ янгиланиши мумкин.

Шалабаевнинг айтишича, Қозоғистоннинг йирик шаҳарларида ҳукумат бинолари, банклар, дўконлар ва машиналарга ўт қўйилган 5-январ куни намойишларда 50 000 одам қатнашган.

Ҳибсга олинганларнинг калтакланаётгани, қийноққа солингани ҳақидаги эътирозлар кетидан Президент Қосим-Жўмарт Тўқаев полицияга ҳуқуқбузарликларнинг олдини олишни буюрди.