Ադրբեջանին առնչող գործի շրջանակներում ՀԴԲ-ն խուզարկել է կոնգրեսական Քուարարի բնակարանն ու ընտրական շտաբը
Հետախուզությունների դաշնային բյուրոն (ՀԴԲ) նախօրեին խուզարկել է Տեքսասից ընտրված կոնգրեսական Հենրի Քուայարի բնակարանը և ընտրական շտաբը լայնածավալ մի գործով, որի հետքերը տանում են դեպի Ադրբեջան, հաղորդում են ամերիկյան լրատվամիջոցները:
«Կոնգրեսականից բացի, գործում ներգրավված են նաև մի քանի ամերիկացի գործարարներ, որոնք կապեր ունեն հետխորհրդային այդ երկրի հետ», - հաղորդում է ամերիկյան NBC News֊ը՝ հղում անելով քննությանը մոտ կանգնած բարձրաստիճան մի պաշտոնյայի:
ABC NEWS֊ն իր հերթին հաղորդում է, որ այս գործով հետաքննությունը վարում է Վաշինգտոնի դաշնային դատախազներից մեկը, սակայն հստակ չէ, թե արդյոք հենց կոնգրեսականն է այդ քննության հիմնական թիրախը:
CNN֊ի հաղորդմամբ, քննությանը ներգրավված է նաև Արդարատության նախարարության այն վարչությունը, որը զբաղվում է ընտրյալ պաշտոնյաների ու կոռուպցիային առնչվող գործերով: Հայտնի է նաև,որ խուզարկության օրդերը տրվել է դատարանի կողմից:
Ըստ ականատեսների, Քուայարի տուն ու գրասենյակ են եկել Հետախուզությունների դաշնային բյուրոյի ավելի քան տասը աշխատակիցներ, որոնք նաև թղթապանակներ ու որոշ իրեր են առգրավել, այդ թվում`համակարգիչ: Դրանից հետո կոնգրեսականի օգնականը հայտարարել է, թե Քուայարը պատրաստ է լիովին համագործակցել իրավապահների հետ:
«Նա պատրաստակամ է երաշխավորել, որ արդարությունն ու օրենքը գերակայեն», ֊ հայտարարել է նրա գրասենյակը:
66-ամյա Քուայարը դեմոկրատ է, Կոնգրեսում է արդեն ավելի քան 15 տարի, ընտրվել Տեքսասի` Մեքսիկայի հետ սահմանակից շրջաններից: Սակայն, լրատվամիջոցները, խոսելով նրա քաղաքական ու օրենսդիր գործունեության մասին առաջին հերթին առանձնացնում են մեկ այլ փաստ. Վերջին տարի երին նա եղել է Ադրբեջանի հարցերով կոնգրեսական հանձնախմբի ղեկավարը, և պարբերաբար հանդիպել է ադրբեջանցի պաշտոնյաների, այդ թվում`Միացյալ նահանգներում Ադրբեջանի դեսպան Էլին Սուլեյմանովի հետ, նշում է ABC news-ը:
Այլ մանրամասներ այս պահին չեն հաղորդվում, Հետախուզությունների դաշնային բյուրոն առայժ հրաժարվում է մեկնաբանություններից: