Тренчевска- Владата се залага минималецот да се зголеми на 18.000 денари

За покачувањето на минималната плата разговарале денеска министерката за труд и социјална политика Јованка Тренчевска и претседателот на Сојузот на синдикати на Македонија, Дарко Димовски, соопшти прес-службата на министерството.

Во соопштението се наведува дека министерката информирала дека Владата останува посветена на заложбата за зголемување на минималната плата.

Владините претставници разговараат со сите засегнати страни -претставници на работодавачите и работниците продолжува за да се најде најодржливо решение за сите отворени прашања, вели министерката за труд.

„Заложбата на Владата е зголемување на минималната плата на 18.000 денари што е можно побрзо во текот на оваа година. Порастот на минималната плата ќе продолжи во текот на целиот мандат и до крајот ќе изнесува 20.000 денари“, рече Тренчевска.

На средбата се разговарало и за правото на регрес за годишен одмор – К15 за работниците.

Ни со две минимални плати не може да се прехрани четиричлено семејство

Министерката истакна дека закажаната средба со владините претставници и Сојузот на синдикати е одложена поради тоа што владина делегација е во посета на Бугарија. Средбата е презакажана за 31 јануари.

Синдикатите бараат минималната плата да се покачи на 18 илјади денари, а потоа скалесто да се покачат и другите плати. Сега минималната плата изнесува околу 15.200 денари.