"შესაძლოა, გაჩერება მოგვიწიოს" - ტელეკომპანია "კავკასია" დახმარებას ითხოვს
"წლების მანძილზე ვცდილობდით შეგვენარჩუნებინა დამოუკიდებელი სარედაქციო პოლიტიკის მქონე მედია. ვცდილობდით არ ვყოფილიყავით მუდმივად გადარჩენის ზღვარზე, და გვეფიქრა განვითარებაზე, თუმცა, სამწუხაროდ დღეს არასახელისუფლო მედიას საქართველოში ისევ გადარჩენისთვის უწევს ბრძოლა", - წერია განცხადებაში.
აქვე აღნიშნულია, რომ უახლოესი ორი თვე არხისთვის უმძიმესია, რადგან აქვთ ფინანსური ვალდებულებები, რამაც შესაძლოა არხის გაჩერება გამოიწვიოს:
"დღეს ჩვენ გვიწევს მოგმართოთ მხარდაჭერის და ფინანსური თანადგომისთვის, რომ გადავრჩეთ და განვვითარდეთ. ამ დროისთვის ტელეკომპანია უმძიმეს ფინანსურ მდგომარეობაშია, რაც მის არსებობას რეალურ საფრთხეს უქმნის. ვმუშაობთ რამდენიმე პროექტზე, რამაც გრძელვადიანად ჩვენი ფინანსური სტაბილურობა უნდა უზრუნველყოს და მოგვცეს საშუალება შევქმნათ ძლიერი საინფორმაციო არხი".
ტელეკომპანია "კავკასია" ვებგვერდზე აქვეყნებს ანგარიშის ნომრებს, სადაც მსურველებს ნებისმიერი თანხის გადარიცხვა შეუძლიათ.
"კავკასია" ერთადერთი არხი არ არის, რომელიც მაყურებელს დახმარებას სთხოვს. ფინანსური პრობლემები აქვს "მთავარ არხსაც" - არხს, რომლის გენერალური დირექტორიც თბილისის საქალაქო სასამართლოს განაჩენით, პატიმრობაშია.