მეცნიერებმა მსოფლიოს უდიდესი მიწისძვრის კვალი აღმოაჩინეს

არქეოლოგებმა კაცობრიობის ისტორიაში ყველაზე დიდი მიწისძვრის კვალი აღმოაჩინეს. 9.5 ბალის სიმძლავრის რყევა, რომელმაც გამოიწვია 5000 მილის სიგრძის (8000 კილომეტრი) ცუნამი და აიძულა მოსახლეობა 1000 წლის განმავლობაში მიეტოვებინათ ახლომდებარე სანაპიროები.

გიგანტური მიწისძვრის დამადასტურებელი მტკიცებულება აღმოაჩინეს საზღვაო და სანაპირო საგნებში, როგორიცაა ზღვის საბადოები, ლოდები, კენჭები და ქვიშა, რაც წარმოიქმნება სანაპირო რეგიონებში. ასევე საზღვაო ქანები და ჭურვები, რომლებიც მკვლევარებმა ჩილეს ატაკამას უდაბნოში ადგილნაცვალ ხმელეთზე იპოვეს.

ეს კატასტროფა დაფიქსირდა დაახლოებით 3800 წლის წინ ახლანდელი ჩილეს ჩრდილოეთით, როდესაც ტექტონიკური ფირფიტის რღვევამ რეგიონის სანაპირო ზოლი ასწია. როგორც მკვლევარებმა დაადგინეს, შემდგომი ცუნამი იმდენად ძლიერი იყო, რომ მან შექმნა 66 ფუტის (20 მეტრის) სიმაღლის ტალღები და მთელი გზა ახალ ზელანდიამდე გაიარა, სადაც ასობით კილომეტრის მანძილზე გადაჰქონდა მანქანის ზომის ლოდები.

აქამდე ყველაზე დიდი მიწისძვრა, რაც კი ოდესმე დაფიქსირებულა, იყო 1960 წლის ვალდივიის მიწისძვრა, რომელმაც დაარტყა სამხრეთ ჩილეს 9,4-დან 9,6 მაგნიტუდამდე, დაიღუპა 6000-მდე ადამიანი და წყნარ ოკეანეში ცუნამის გავრცელება გამოიწვია.

იმპულსი, რომელიც ამ მოვლენის გამომწვევი გახდა იყო უზარმაზარი და ვრცელდებოდა 500 მილის (800 კმ) სიგრძემდე. მაგრამ, როგორც მეცნიერები დეტალურად აღწერენ კვლევაში, რომელიც გამოქვეყნდა ჟურნალში Science Advances, ახლად აღმოჩენილი უძველესი მეგამიწისძვრა კიდევ უფრო დიდი იყო და დაახლოებით 620 მილის (1000 კმ) სიგრძის რღვევა გამოიწვია.

მკვლევარები თვლიან, რომ ამ ადგილების უკეთ შესწავლაა საჭირო, რადგან დღეს ეს ტერიტორიები დასახლებულია და ტურისტულ ცენტრებს წარმოადგენს, რის გამოც ბუნებრივი კატასტროფების შემთხვევაში შედეგები შეიძლება ძალიან მძიმე აღმოჩნდეს.

წყარო: livescience.com