ზუგდიდის „დინამო“ გარიგებულ თამაშებში მონაწილეობას უარყოფს და პროკურატურას მიმართავს

ზუგდიდის საფეხბურთო კლუბი „დინამო“ საქართველოს ფეხბურთის ფედერაციის სადისციპლინო და დავების განმხილველი კომიტეტის გადაწყვეტილებას აპროტესტებს, რომლის მიხედვითაც „გარიგებულ თამაშებში“ მონაწილეობის გამო კლუბს სასჯელი დაეკისრა და პრაქტიკულად უფუნქციოდ დარჩა. კლუბის ხელმძღვანელობა მიმართავს პროკურატურას დაიწყოს გამოძიება, რის საფუძველზე მიიღო ფეხბურთის ფედერაციის სადისციპლინო და დავების განმხილველმა კომიტეტმა გამამტყუნებელი გადაწყვეტილება და ასევე ითხოვს კლუბისთვის „უსამართლოდ“ დაწესებული სასჯელის გაუქმებას.

კლუბში აცხადებენ, რომ შესაბამისი წერილით უკვე მიმართეს ფიფას და უეფას, მათ  თბილისის საქალაქო სასამართლოშიც შეტანილი აქვთ სარჩელი, კომიტეტის გადაწყვეტილების გაბათილების თხოვნით.

უკმაყოფილების მიზეზი და დავის საგანი გახდა ფეხბურთის ფედერაციის სადისციპლინო და დავების განმხილველი კომიტეტის 21 მაისის გადაწყვეტილება, რომლითაც „გარიგებულ თამაშებში მონაწილეობის“ გამო ზუგდიდის "დინამო" მოხსნეს 2022 წლის ეროვნული ლიგა 2-ის გათამაშებიდან და დაქვეითდა ერთი საფეხურით დაბალ დივიზიონში. ასევე დისკვალიფიცირებულია 2022 წლის დავით ყიფიანის სახელობის თასის გათამაშებიდან და დაჯარიმებულია 10 000 ლარის ოდენობით. გარდა ამისა, ფულადი ჯარიმა დაეკისრა და დროებით ეაკრძალა ფეხბურთთან დაკავშირებული საქმიანობა "დინამოს" ფეხბურთელების ნაწილს. ანალოგიური გადაწყვეტილება მაშინ კომიტეტმა თბილისის "შევარდენ 1906-ის" მიმართაც მიიღო.

ზუგდიდის „დინამოს“ პრეზიდენტმა ზაზა ჯანაშიამ და კლუბის ადვოკატმა ჯიმშერ ტყებუჩავამ დღეს, 3 აგვისტოს გამართულ პრესკონფერენციაზე აღნიშნეს, რომ ფეხბურთის ფედერაციამ მიზანმიმართულად მიიღო „დინამოსთვის“ საზიანო გადაწყვეტილება, ისე, რომ მის წარმომადგენლებს არ მიეცათ თავის მართლების შესაძლებლობა.

ზუგდიდის „დინამოს“  პრეზიდენტი უარყოფს ე.წ. გარიგებულ თამაშებში მონაწილეობას და ამბობს, რომ არ აპირებს მისთვის  უსამართლოდ დაკისრებული ჯარიმის გადახდას:

„ყველაფერს ვაკეთებდით იმისთვის, რომ წინ წავსულიყავით. გუნდი მეოთხე ადგილზე მყავდა და იმნაირი რაღაც მომდეს, ვერ გავიგე რატომ, რის გულისთვის დაგვჩაგრეს. ჩემთან 60 ადამიანი მუშაობს, რომლებიც უხელფასოდ დატოვეს. ვუთხარი ფედერაციას, რას აკეთებთ მეთქი, ხალხი უმუშევრად რჩება მეთქი. არანაირი მტკიცებულება არ აქვთ, ვერანაირი მტკიცებულება ვერ დამიდეს... გუნდი უნდა დაბრუნდეს იქ, სადაც იყო. ყველანაირი დაფინანსება უნდა აღდგეს. ეს არის ჩემი სახელის გატეხვა და ქალაქის შეურაცხყოფა. ეს მარტო ჩემი შეურაცხყოფა კი არ არის. რაც ხალხს უყვარს და გულშემატკივრობენ, იმ საქმეს ვაკეთებდი მე. მაგრამ ვიღაც ვიღაცებს ეს არ მოწონთ. არ ვიცი რატომ. ის ვიცი, რომ როცა რაღაცას მაბრალებენ, მტკიცებულებაც უნდა დამიდონ“, - განაცხადა ზაზა ჯანაშიამ.

კლუბის ადვოკატის  ჯიმშერ ტყებუჩავას თქმით, "დინამო" ზუგდიდს ჯერაც არ მიეღო სადისციპლინო კომიტეტის პირველი ინსტანციის გადაწყვეტილება, რომ ფედერაციის ფონდიდან მიიღეს წერილი დაფინანსების შეწყვეტაზე, რაც კლუბის ხელმძღვანელობას უმყარებს ეჭვს, მათ წინააღმდეგ მიზანმიმართული კამპანიის მზადებაზე. ტყებუჩავას სიტყვებითვე, უფრო მეტის დაკონკრეტებისგან ჯერ-ჯერობით თავს შეიკავებს:

„მე რა ეჭვი მაქვს? კიდევ ერთხელ ვამბობს, რომ რაც ჩემთვის, როგორც ადვოკატისთვის გახდა ცნობილი ჩვენი კოდექსის და კანონის მიხედვით, ამ წუთას სახალხოდ გაჟღერების უფლება არ მაქვს, არის სერიოზული წყალქვეშა დინებები. ეჭვს გამოვთქვამ, რომ იმის გამოისობით, რომ ფეხბურთის ფედერაციამ არ გადასცა პროკურატურას მასალები, ვიღაც ხელს აფარებს, ფედერაციაში არის, ან შეიძლება იყოს გუნდი, შეიძლება იყვნენ კონკრეტული პიროვნებები, რომლებიც ამ თაღლითურ სისტემაში არიან ჩართულები და ხელს აფარებენ იმ ადამიანებს, რომლებიც ამ თამაშებს აკეთებენ და უეფასთვის საჩვენებლად „დინამო“ ზუგდიდი გაწირეს.

ფაქტობრივად „დინამო“ ზუგდიდს ჩაბარებული არ ჰქონდა პირველი ინსტანციის გადაწყვეტილება, ლაპარაკია სადისციპლინო კომიტეტზე, კლუბს მოაწიეს წერილი ფედერაციის ფონდიდან, რომ რადგან დაქვეითებული ხართ, დაფინანსება შეგიწყდათო. ეს ფონდი უმაღლეს და მეორე ლიგის გუნდეს აფინანსებს. გადაწყვეტილება არ იყო მოსული, წერილი არ იყო აკრეფილი, რომ ფონდის წერილმა დაასწრო. ჩნდება დასაბუთებული ვარაუდი, რომ „დინამო“ ზუგდიდი არის განტევების ვაცი. წინასწარ მზადდებოდა კლუბის წინააღმდეგ ეს კამპანია“, - განაცხადა პრესკონფერენციაზე კლუბის ადვოკატმა. 

კლუბი ფედერაციისგან ითხოვს, გასაჯაროვდეს ყველა ის მტკიცებულება რის მიხედვითაც ზუგდიდის „დინამოს“ „გაყიდულ თამაშებში“ მონაწილეობა დაუდგინეს და სასჯელი დააკისრეს.

თავის მხრივ ფეხბურთის ფედერაცია „დინამოს“ ბრალდებებზე კომენტარს არ აკეთებს. მათ ვებ-გვერდზე 22 მაისს გამოქვეყნებულ განცხადებაში კი ვკითხულობთ, რომ სადისციპლინო კომიტეტი გადაწყვეტლების მიღებამდე გაეცნო უეფას თაღლითური ფსონების ამოცნობის ანგარიშს, მხარეთა ახსნა-განმარტებებს და მატჩებში საეჭვო ეპიზოდების ვიდეო ჩანაწერს.