Aqmescitte Rusiye ordusı işğal etken Hersonğa avtobus seferleriniñ sayısı eksiltildi
Aqmescitniñ «Kurortnaya» avtostantsiyasında Rusiye ordusı işğal etken Herson şeerine avtobus seferleriniñ sayısı eksildi, dep haber ete Qırım.Aqiqat mühbiri.
Daa evel avtobus seferleri Aqmescitten Hersonğa künde üç kere ola edi: saat 6:30, 10:30 ve 14:30-ta. Lâkin avgustnıñ 3-nden başlap saat 10:30-ta olğan sefer lâğu etildi.
Avtostantsiya hadimleri sebebini aytmay, amma yol parası 500 rublege arttı, dep qayd ete – 1300-den 1800 rublege qadar arttı, yol 5 buçuq saattan aman-aman 9 saatqa arttı. Kassacılarnıñ aytqanına köre, bu, avtobusnıñ Hersonğa Antoniv köprüden degil, Nova Kahovkadan ketkeninen bağlı.
«Kurortnaya» avtostantsiyası – 2022 senesi iyülniñ 1-nden itibaren işğal etilgen Qırımnıñ Rusiye akimiyetiniñ teşebbüsinen 2014 senesinden berli Rusiye keçiş noqtaları olğan Herson vilâyetiniñ memuriy sıñırındaki Çonğar ve Ermeni Bazar yaqınlarına avtobus qatnağan yekâne avtostantsiyadır. Anda gümrük ve sıñır kontrolinden soñ yolcular Herson, Melitopol ve Berdânskqa kete – endi yerli, Ukrayına, taşıyıcılarınıñ avtobuslarınen.
Berilgen malümatqa köre, iyülniñ 26-nda aqşam Ukrayına arbiyleri Hersondaki Antoniv köprüne kene darbe endirdi. Herson vilâyetiniñ Rusiye işğalci memuriyetiniñ yolbaşçı muavini Kırılo Stremousov iyülniñ 27-nde saba köpür areketke qapatıldı, dep bildirdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.