ქართველი მებრძოლი მიშა ყაფლანიშვილი უკრაინაში დაიღუპა

უკრაინაში, რუსეთის სამხედრო აგრესიის წინააღმდეგ ომში ქართველი მებრძოლი მიშა ყაფლანიშვილი („კაპლანი") დაიღუპა.


ყაფლანიშვილის დაღუპვის შესახებ ვიდეომიმართვა გაავრცელა ქართველმა ვიცე-პოლკოვნიკმა ვანო ნადირაძემ, რომელიც უკრაინის შეიარაღებული ძალების რიგებში რვა წლის განმავლობაში იმყოფება. ნადირაძე ჰყვება, რა ვითარებაში დაიღუპა ქართველი მებრძოლი.


„მინდა ყველამ იცოდეს, ძალიან მაგრად იბრძოლა [მიშა ყაფლანიშვილმა], ძალიან ვაჟკაცურად იბრძოლა, მაგრამ, სამწუხაროდ, დაბომბვის დროს ჭურვის ნამსხვრევი მოხვდა. ადგილზე დაიღუპა... დიდება გმირებს! დიდება საქართველოს! დიდება უკრაინას!" - ამბობს ვანო ნადირაძე.


უკრაინაში რუსეთმა ომი 24 თებერვალს დაიწყო. ქართველი მებრძოლების დაღუპვის შესახებ პირველი ინფორმაცია 18 მარტს გავრცელდა. მას შემდეგ უკრაინაში 21 ქართველი მებრძოლი დაიღუპა.