Пендаровски ги прими акредитивните писма на новата амбасадорка на САД Анџела Агелер
Македонскиот претседател Стево Пендаровски денеска ги прими акредитивните писма од американскиот претседател Џо Бајден, со кои Анџела Прајс Агелер е именувана за нова амбасадорка на САД во Северна Македонија.
Акредитивните писма амбасадорката Агелер му ги предаде на Пендаровски на церемонија во претседателската Вила Водно.
Пендаровски ѝ посака на Агелер успех во вршењето на функцијата и рече дека Северна Македонија во континуитет посветува посебно внимание на развојот на пријателските односи и билатералната соработка со САД, за кои посочи дека земјата ги смета за голем пријател, значаен економски партнер и искрен поддржувач во најтешките моменти уште од независноста на земјата.
„Посебно ме радува фактот што во изминатиот период билатералните односи меѓу нашите држави ги градиме и унапредуваме како сојузници во НАТО Алијансата, споделувајќи ги заедничките вредности на демократијата, слободата и човековите права, како и заложбите за меѓународен поредок базиран врз правила“, рече Пендаровски.
Пендаровски, исто така, изрази благодарност за поддршката на САД за започнување на пристапните преговори на Северна Македонија за членство во Европската Унија и додаде дека на тој пат „анахроните теми и дискусии за идентитети и наметнати историски вистини претставуваат сериозна пречка која има потенцијал да го закочи интегративен пат на земјата“
„И со самото тоа, да го држи целиот регион во неизвесност, а тоа генерира нестабилност. Всушност, започнатиот дијалог во рамките на Самитот за демократија, под водство на претседателот Бајден е најдобриот показател кон какви цели треба да се стремат демократските држави во меѓусебните односи“, рече Пендаровски.
Корупцијата и судството приоритети на новата американска амбасадорка
Амбасадорката Агелер рече дека повеќе од 30 години работат заедно за Северна Македонија да го добие „заслуженото место поголемата европска заедница“, преку поддржување на основните вредности на една просперитетна демократија, како почитување на владеење на правото, еднакви можности за правда, економски раст и лично изразување, како и преку посветеност кон постигнувањето на овие цели отворено и транспарентно.
Таа рече дека Северна Македонија се соочува со предизвици во темелите на сите овие столбови, но дека на патот напред „САД ќе бидат тука како партнер, сојузник и пријател, негувајќи односи, што ќе стануваат се посилни, подлабоки и попродуктивни.“
Таа додаде дека Северна Македонија се соочила со големи предизвици и дека донела тешки одлуки на патот кон евроатлантските интеграции, како промената на името за да стане 30-тата членка на НАТО и отворање на пристапните преговори за членство во Европската Унија, но посочи дека „иднината е навистина светла, и покрај тоа што земјата се соочува со стари и со нови предизвици.“
„Денес сум овде да ветам дека нема сами да се соочите со тие предизвици. Соединетите Американски Држави, Амбасадата на САД и јас ќе сториме сè што е во наша моќ да им помогнеме на луѓето во Северна Македонија да успеат да ги прифатат и да ги надминат сите тие предизвици. Ви го давам мојот личен завет дека ќе стоиме рамо до рамо со луѓето на оваа земја, така како што земјата ги остварува своите цели за мир, просперитет, безбедност и независност за сите свои граѓани. Европа се соочува со најголемата закана, каква не е видена со генерации, а Северна Македонија, како сигурен, активен сојузник во НАТО, придонесува за безбедноста и стабилноста во Европа“, рече Агелер.
Ова не е прв ангажман на Агелер во Македонија, бидејќи претходно во нејзината дипломатска кариера таа била ангажирана и како претставник за односи со јавноста во Американската амбасада во Скопје.
Во нејзината биографија се наведува дека зборува македонски, француски и делумно хинду јазик. Агелер доаѓа на местото на Кејт Мари Брнз, која ја извршуваше функцијата амбасадорка на САД во Скопје од 2019 година.