Qo‘qondagi reabilitatsiya markazida 15 yashar o‘smir zo‘ravonlik qurboni bo‘ldi
Shu yilning 16-oktabr kuni Farg‘ona viloyati Qo‘qon shahridagi Bolalarni reabilitatsiya qilish va moslashtirish markazidan Uchko‘prik tumani Sulton MFY Sulton qishlog‘ida yashagan 15 yashar Ravshanbek Abdusattorovning o‘ligi chiqdi.
Ozodlik manbalariga ko‘ra, Ravshanbek Yangiqo‘rg‘on qishlog‘ida joylashgan “Ansor” savdo majmuasidan bir dona Flash ichimligi va 4 dona qurut (umumiy bahosi 16 700 so‘m (1,5 AQSh dollari) o‘g‘irlaganlik aybi bilan mahalliy uchastka inspektori tomonidan tutib kelingan va so‘roq qilingan.
16-oktabr kuni gumondor soat 21.00 da maxsus tibbiy nazoratdan o‘tkazilib, Markazga topshirilgan. Mazkur Markaz ixtisoslashtirilgan reabilitatsiya muassasasi bo‘lib, voyaga yetmagan huquqbuzarlarni tarbiyalash bilan shug‘ullanadi.
Ravshan Abdusattorov kim?
Ozodlikka ma’lum bo‘lishicha, 2007-yilning 19-noyabrida Farg‘ona viloyati Uchko‘prik tumanida tug‘ilgan Ravshanbek ota-onasi ajrashganligi sababli tog‘alarining qo‘lida katta bo‘lgan.
Ravshanbekning Ozodlik muxbiri suhbatlashgan sinfdoshlaridan biri uni "odamovi" va "jismonan biroz nimjon" bola sifatida eslashini aytdi.
O‘smir yoshiga yaqinlasharkan, Ravshanbek turli ko‘cha yumushlarini bajargan, kattalar e’tiboridan chetda qolgan.
Yaqinlarining aytishicha, uning jasadini ikki kun davomida morgdan berishmagan. Jasad Quva shahridagi morgga yuborilgach, o‘likxonada ishlovchi marhumning mahalladoshi jasadni tanib qoladi va bu haqda yaqinlariga xabar beradi.
O‘smirning o‘limida kimlar gumonlanmoqda?
Farg‘ona viloyati prokuraturasi tarqatgan xabarga ko‘ra, 17.10.2022-yilda voyaga yetmagan R.A. ning sog‘lig‘i yomonlashib, hushidan ketganligi sababli shahar Tez-tibbiy yordam xodimlari chaqirilib, unga tibbiy yordam ko‘rsatilishiga qaramasdan, shifoxonaga olib ketilayotgan vaqtida vafot etgan.
Ozodlikda nusxasi mavjud Sud-tibbiy ekspertizasining dastlabki xulosasiga ko‘ra, marhumning o‘limiga “bosh miya kalla yopiq shikasti, miya qattiq parda ostiga qon quyilishi, bosh miya moddasining lat yeyishi” sabab bo‘lgan.
Dastlabki ma’lumotlarga ko‘ra, 16-oktabr kuni soat 21.00 da Ravshanbek Abdusattorov reabilitatsiya markaziga huquqbuzarlik bilan 20 sutkalik qamoq jazolarini o‘tayotgan shaxslar yoniga joylashtirilgan. Ular Ravshanbekka tunda tan jarohati yetkazgan bo‘lishi mumkin, degan faraz mavjud.
Ammo marhumning yaqinlari Ravshanbekning olgan tan jarohatlari markaz xodimlari tomonidan yetkazilgan bo‘lishi mumkin, deb gumon qilishmoqda. Bu kabi gumonga marhumning jasadi oradan ikki kun o‘tib yaqinlariga berilgani sabab bo‘lgan. Ammo bu borada tergovga biron dalil taqdim qilingani Ozodlikka ma’lum emas.
Marhumning yaqinlari tomonidan Ozodlikka taqdim etilgan fotosuratlar uning qiynoqqa solingani alomatlarini ko‘rsatadi.
Mazkur holat yuzasidan Qo‘qon shahar prokuraturasi tomonidan 18.10.2022-yilda O‘zbekiston Respublikasi JKning 104-moddasi 3-qismi “d” bandi (jabrlanuvchining o‘limiga sabab bo‘lgan og‘ir tan jarohati yetkazish) bilan jinoyat ishi qo‘zg‘atilgan.
“Tergov harakatlari davomida, jinoyatga bevosita aloqador ikki nafar shaxsga nisbatan ayblov e’lon qilinib, “qamoq” ehtiyot chorasi qo‘llanilgan. Shuningdek, holat yuzasidan IIB JXX HPB VEIHYoKM xodimlariga nisbatan xizmat tekshiruvi tayinlangan.
Hozirda jinoyat ishi bo‘yicha Qo‘qon shahar prokuraturasi tomonidan dastlabki tergov harakatlari davom ettirilmoqda”, deyiladi Farg‘ona viloyati prokuraturasining rasmiy bayonotida.
Qiynoq iddaolari ko‘paydi
Ozodlikka ma’lum bo‘lishicha, hozirda Qo‘qondagi reabilitatsiya markazi xodimlari Ichki ishlar vazirligi maxsus inspeksiyasi tomonidan tekshirilmoqda.
Tekshiruvlarga O‘zbekiston Respublikasi Ichki ishlar vaziri o‘rinbosari Yahyojon Abdulhaqov boshchilik qilayotgani aytiladi.
O‘zbekiston inson huquqlari “Ezgulik” jamiyati o‘zining ijtimoiy tarmoqlardagi sahifalarida so‘nggi paytlarda gumondor va mahkumlarga nisbatan qiynoq qo‘llanilgani haqidagi iddaolar yana ko‘payganiga e’tibor qaratdi. Bir vaqtning o‘zida, jamiyatning bildirishicha, prokuratura organlari qiynoq iddaolari yuzasidan sud idoralariga protest kiritish holatlari ko‘paygani kuzatilmoqda.
Jumladan, tashkilotning xabar qilishicha, O‘zbekiston Respublikasi JKning 166-moddasi (Talonchilik) bilan ayblangan fuqaro Otabek Abdumavlonov dastlabki tergov jarayonida "shafqatsiz" qiynoqqa solingan.
Toshkent shahar prokurori U. Qosimovning protestiga ko‘ra, appelyatsiya sudi ishni qayta ko‘rib chiqqan va sudlanuvchiga nisbatan berilgan uzoq muddatli qamoq qisqartirilgan. Otabek Abdumavlonov qamoqdan ozod qilingan.
Shuningdek, "Ezgulik" xabarida aytilishicha, Jizzax viloyati Dashtobod shaharchasida istiqomat qilgan Abduqodir Berdimurodovga nisbatan qiynoq qo‘llagan, unga hayoti uchun xavfli tan jarohatlari yetkazgan Zomin tumani IIB xodimlariga nisbatan O‘zbekiston Respublikasi JKning 104-moddasi bilan jinoyat ishi qo‘zg‘atilibdi.
Shuningdek, Sirdaryo viloyati Yangiyer shahar IIB xodimlarining fuqaro O‘rol Toshpo‘latovga nisbatan sodir etgan xatti-harakatlari yuzasidan tergovga qadar surishtiruv ishlari boshlangani xabar qilinadi.