"Qıyınlıqlar kelgende, erkekler peyda ola". Azamat Eyupovnıñ ikâyesi
Alçaqgöñülliliklerinden sebep davaları bilinmegen insanlar bar. Olar çıqlıqtan qaçınırlar, amma muvafaqiyetleriniñ müimligi ölçelenmezdir, hususan da halqınıñ namusını qorumaq içün oña qayğı köstermek ile bağlı olsa. Aydın adını yalan qabaatlardan temizlemek içün böyle bir insan aqqında aytıp bermek isteyim.
Azamat ağa Eyupov ile ilk sefer menim de tutulğanım Rostov-na-Donu şeerinde 1 SİZO-nıñ kamerasına kirgende körüştim ve tanıştım.
"Selâm aleyküm, Ruslan!", - Eyup ağa ücrege kirgende utanıp ve sıqılıp degen edi. Yüzü tebessüm ile aydınlanğan edi ve onıñ kelgeninen etraf müsbet duyğularnen tolğan edi. Biz pek tez dostlaştıq, onıñ sadeligi ve añlayışı munasebetlerniñ qurulmasında mahsus bir şey talap etmey edi. Onen daima samimiy laf etmek, ondan faydalı tevsiye eşitmek mümkün edi. Qonuşuvdaki çıdamlığı, yaşına baqmadan tahqiqat tevqifhanesi şaraitinde fizikiy ve maneviy sabırı diqqatqa lâyıq nümünedir. Onıñ er bir adise içün anası balalıqta ögretken qırımtatar ata sözleri azırdır.
Sabır köstermek kerek olğanda Eyup ağa "Sabırnıñ tübü sarı altındır" dey edi.
Gençlerniñ zemaneviy vaziyetini ve onıñ sebeplerini muzakere etkende o "Quş yuvasında körgenini küter" dey edi.
Qırım, halqımıznıñ ananeleri ile bağnı ğayıp etmemek ve göñlümiz içün yaqın müitni is etmek maqsadınen cuma namazı künü cuma qavesini, bayramlarğa bayram qavesini, yahşı haber kelgende köz aydın qavesini içe edik, keçmişni hatırlay edik ve tuvğan tilimizde laf ete edik. Böyle anlarda qalp Qırımğa, tuvğan yerlerge asretnen sarıla edi ve tuvğan yerlerimizge qaytmaq içün bir anlıq quşqa çevirilmege istey edik.
Kimerde, SİZO-da insult keçirgen soñ bir ayağına ağır yaslanıp ücrede yürgen 60 yaşındaki adam, dört qızına terbiye bergen baba - Azamat ağağa, onıñ çalarğan saçlarına baqıp, oña iç bir şekilde yardım etip olamağanım içün qalbim ağıra edi ve bir vaqıtlar sürgünlik yerlerinden Qırımğa qaytuv oğrunda küreşken bu adamnıñ qaytıp olğan soñ şimdi kene tuvgan yarımadasından qoparılğanını, bir vaqıtlar halqı kibi aqsız yerde suçlanğanını añlamağa daa da ağır edi.
1988 senesi Azam ağa bütün halqnıñ adından Moskvağa vesiqalarnı alıp ketken edi.
Buña sebep ise ŞSCB Yuqarı Şurasınınh reisi A.Gromıko tarafından yapılğan bildirüv oldı. Şuralar Birliginiñ er yerinde televizion ve radioda qırımtatarlar cenk vaqtında hain olğanlarını, iddiağa köre büyük sobalarda adamlarnı yaqqanlarını aytqan ve daa bir sıra iftira atqan edi. O zaman Yuriy Osmanov (Qırımtatar Milliy areketiniñ liderlerinden birni - QA) 15-20 saifelik maqale şeklinde reddiye yazğan edi.
Bu vazifeni eda etmek şerefi Azamat ağa, Ferğanadan olğan Rustem ağa ve daa bir kişiniñ üstüne tüşti. Üçünci kişiniñ adını Azamat ağa hatırlap olamadı. Ve olar, üstüne mesüliyet alıp, bu maqaleniñ birer nushasını 10 instantsiyağa alıp barmaq kerek ediler.
Ekinci kere Moskvağa Azamat ağa 2019 senesi ketti. Anda Qızıl meydanda o bir kişilik pikette öz halqınıñ şerefini kene qorçalap, Rusiye quvetçileri tarafından semetdeşleriniñ üzerine asılğan terrorcılıq ve ekstremizm aqqında miflerni yoq etmek tırışqan edi.
Ne accı kerçeklik, ne de yıllar onı yeñemedi. Öz halqınıñ lâyıq oğlu Azamat ağa ile tanışqanıma pek memnünim.
Meşur insanlardan birisi "Gece kelgende kökte yıldızlar peyda ola. Qıyınlıqlar kelgende, erkekler peyda ola" dedi.
Allah Azamat ağadan razı olsun. Bu sınavdan keçmek içün oña quvet ve sağlıq bersin.
Ruslan Suleymanov, vatandaş jurnalisti, faal, «qırımlı musulmanlar davasınıñ» mabüsi
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
MALÜMAT: 2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatar) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.