Հայ Դատի հանձնախմբի պատվիրակությունը հանդիպել է Կանադայի ԱԳ նախարարի հետ․ ներկայացրել է քաղաքական ու դիվանագիտական առաջարկների թղթածրար
Հայ Դատի հանձնախմբի պատվիրակությունը հանդիպել է Կանադայի արտաքին գործերի նախարար Մելանի Ջոլիի հետ։ Հայտնել է ՀՅԴ մամուլի ծառայությունը։
Կանադայի հանձնախմբի հետ հանդիպման ընթացքում քննարկվել է Արցախում ստեղծված ծանր իրավիճակը, բնակչության ապահովությանը և անվտանգությանը սպառնացող շրջափակման հարցը։
Մեկ անգամ ևս կարևորելով Արցախի և արցախահայության ազգային ինքնորոշման իրավունքի սկզբունքը՝ Հայ Դատի հանձնախումբը շեշտել է, որ «այս սկզբունքի իրականացումը արցախահայության ապահով ու խաղաղ կյանքի երաշխիքն է, և Արցախը երբեք չի ենթարկվի Ադրբեջանի ու դառնա նոր ցեղասպանության զոհ»։
Կանադայի Հայ Դատի հանձնախումբը ներկայացրել է քաղաքական ու դիվանագիտական առաջարկների թղթածրար, որը «Օտտավայի կառավարությունը կարող է իրականացնել և սատարել արցախյան ճգնաժամը հաղթահարելու համար»։
Նախարարը հայտարարել է Հայաստանում Կանադայի դեսպանատան մոտալուտ բացման մասին՝ նշելով, որ իր մասնակցությամբ արարողությունը տեղի կունենա առաջիկա սեպտեմբերին։