Ռուսաստանը 8 հրթիռի հարվածով շարքից հանել է Ուկրաինայի ամենամեծ հիդրոէլեկտրակայանը
Դնեպրի հիդրոէլեկտրակայանը, որը գտնվում է Զապորոժիեում և Ուկրաինայի ամենամեծ հիդրոէլեկտրակայանն է, դադարեցրել է աշխատանքը լուրջ վնասների պատճառով։ Անցած գիշեր ռուսական կողմի հրետակոծության ժամանակ հիդրոէլեկտրակայանը խոցվել է ութ անգամ, ասել է Ուկրաինայի գլխավոր դատախազության ներկայացուցիչ Յուրի Բելոուսովը։
«Այսօր Զապորոժիեն ենթարկվել է ամենազանգվածային հարձակմանը. ութ անգամ խոցվել է հենց հիդրոէլեկտրակայանը, այսինքն՝ ութ հրթիռ խոցել է Ուկրաինայի համար չափազանց կարևոր այս օբյեկտը, որը ոչ միայն հզոր էներգետիկ բաղադրիչ է պարունակում, այլև այլ գործառույթներ է կատարում»,- ասել է Բելոուսովը:
Նա հավելել է, որ իրենք կփորձեն հնարավորինս արագ վերականգնել և վերագործարկել կայանը, սակայն վնասը շատ լուրջ է, գրում է kommersant.ru-ն։
Ուկրաինայի էներգետիկայի նախարար Գերման Գալուշչենկոն հայտարարել էր, որ Ռուսաստանի հրթիռային հարձակման հետևանքով Ուկրաինայի տարբեր շրջաններում վնասվել են արտադրական օբյեկտներ և էլեկտրաէներգիայի փոխանցման ու բաշխման համակարգեր։ Նախարարի խոսքով՝ սա վերջին ժամանակներում ամենախոշոր հարձակումն է Ուկրաինայի էներգետիկ համակարգի վրա։
«Ուկրհիդրոէներգո» ընկերությունը հայտարարել է, որ Դնեպրի հիդրոէլեկտրակայանը, որը գտնվում է Զապորոժիեում, հրետակոծության է ենթարկվել։
«Նպատակը ոչ թե պարզապես վնասելն է, այլ նախորդ տարվա նման կրկին փորձել լայնածավալ խափանել երկրի էներգետիկ համակարգը»,- ասել է նախարարը։ Ըստ Գալուշչենկոյի՝ հրետակոծության ժամանակ հոսանքազրկվել է նաև Զապորոժիեի ատոմակայանը մատակարարող էլեկտրահաղորդման գծերից մեկը։
Ուկրաինայի որոշ շրջաններում հոսանքազրկումներ են. Ուկրաինական ԴՏԷԿ էներգետիկ հոլդինգը պնդում է, որ ընկերության ՋԷԿ-երը հրետակոծության են ենթարկվել, և դրանց սարքավորումները լրջորեն վնասվել են։
Խարկովի քաղաքապետ Իգոր Տերեխովը հայտնել է, որ անցած գիշեր քաղաքում 15 պայթյուն է տեղի ունեցել, հարձակումներն ուղղված են եղել էներգետիկ ենթակառուցվածքներին։ Խարկովի պոմպային ենթակայաններում հոսանքի կորստի պատճառով ջրամատակարարման հետ կապված խնդիրներ կան, էլեկտրաէներգիայի հետ կապված խնդիրների պատճառով երթուղիներում էլեկտրական տրանսպորտ չի գործի։
Ուկրաինայի Զապորոժիեի շրջանային վարչակազմի ղեկավար Իվան Ֆեդորովը պնդում է, որ հրետակոծության պատճառով Զապորոժիեի ԱԷԿ-ը հայտնվել է հոսանքազրկման եզրին։ Զապորոժիեի ԱԷԿ-ի ղեկավարությունը հայտնել է նաև բարձրավոլտ երկու գործող գծերից մեկի աշխատանքի դադարեցման մասին։ Ընդգծվել է, որ ատոմակայանի անվտանգությանը վտանգ չի սպառնում։
Դնեպրոպետրովսկի շրջանային պետական վարչակազմի ղեկավար Ալեքսանդր Վիլկուլը նույնպես հայտնել է հրետակոծության մասին։ Նրա խոսքով՝ գրոհի է ենթարկվել Կրիվոյ Ռոգի էներգետիկ ենթակառուցվածքը, քաղաքում մտցվել է էլեկտրաէներգիայի անջատումների արտակարգ ժամանակացույց։